DILI, 29 Jullu 2024 (TATOLI) – Ministru Agrikultura, Pekuária, Peska no Floresta, Marcos da Cruz, husu ba komunidade iha postu administrativu Venilale, munisípiu Baucau atu koopera ho Governu hodi aselera konstrusaun ba irrigasaun Galata.
Ministru preokupa tebes ho pkonstrusaun irrigasaun Galata ne’ebé to’o agora sei kontinua hetan impedimentu husi komunidade, maske Ministériu Agrikultura, Pekuária, Peska no Floresta (MAPPF) halo ona esforsu hodi rezolve asuntu ne’e hamutuk ho komunidade, maibé seidauk iha solusaun tanba iha parte balun maka uza naran komunidade nian hodi interven iha prosesu konstrusaun ba irrigasaun ne’e.
“Ha’u hatene iha ema balun maka aproveita komunidade hodi impede irrigasaun Galata ne’e, maibé hodi naran Governu nian husu nafatin ba komunidade labele halo impendimentu ba dezenvolvimentu setór agrikultura sira ne’ebé Governu hakarak dezenvolve, tanba irrigasaun Galata ne’e importante tebes atu fornese bee ba natar agrikultór sira-nian”, Marcos da Cruz hateten iha Comoro, ohin.
Governante ne’e dehan iha grupu balun maka lori komunidade nia naran hodi dehan ba Governu katak bainhira konstrusaun ne’e atu la’o tenke halo uluk indemnizasaun, tanba grupu balun ne’e dehan sira seidauk presiza dezenvolvimentu tama iha sira-nia fatin.
“Ita hakarak serbisu ne’e ba oin. Tanba ne’e, ita presiza serbisu hamutuk. Konkursu ba projetu ne’e la’o ona, tanba ne’e, ha’u husu ba komunidade iha Venilale bainhira projetu ne’e la’o ona labele halo impendimentu”, ministru husu.
Nia salienta komunidade halo protesta hodi impede projetu ne’e ho razaun katak rai ne’e sira-nian no labele ke’e arbiru de’it, maibé ke’e ne’e atu halo kanalizasaun bee ba natar sira hodi fó moris ba komunidade iha Venilale. Tanba Estadu hakarak hakbesik povu iha área rurál ba dezenvolvimentu sira iha estrada, inklui iha setór agrikultura hodi dezenvolve munisípiu sira ne’ebé iha poténsia agríkola.
“Governu sentrál nafatin iha programa hodi serbisu hamutuk ho komunidade oinsá atu dudu prosesu sira ne’e bele la’o lalais, tanba ema barak mak terus no mate ba rai ida ne’e”, nia afirma.
Governante ne’e apela ba agrikultór sira atu labele husik rai abandonadu, tanba ne’e tenke informa ba malu hodi dezenvolve rai potensiál sira, liuliu kuda produtu lokál hodi hasa’e rendimentu família nian iha kada munisípiu.
Notísia relevante: Projetu konstrusaun irrigasaun Galata hamosu dezentendimentu
Jornalista: Tomé Amado
Editora: Maria Auxiliadora
