MS presiza reabilita sala maternidade iha sentru saúde Hautio-Ainaro
DILI, 29 jullu 2024 (TATOLI)—Komisaun F trata asuntu Saúde, Seguransa Sosiál no Igualidade Jéneru iha Parlamentu Nasionál (PN), rekomenda ba Ministériu Saúde (MS) atu halo reabilitasaun ba sala maternidade sentru saúde Hautio iha munisípiu Ainaro.
“Rekomenda ba Ministériu Saúde (MS) tau prioridade ba reabilitasaun sala maternidade sentru saúde Hautio no disponibiliza transporte ba profesionál saúde atu asegura atendimentu saúde adekuadu ba pasiente sira,” refere relatóriu fiskalizasaun komisaun F ne’ebé Agência TATOLI asesu, segunda ne’e.
Komisaun F ne’ebé lideradu husi prezidente komisaun, Maria Gorumali Barreto, akompañadu husi deputadu membru komisaun foin lala’s ne’e, iha fulan-juñu tinan ne’e, realiza fiskalizasaun ba sentru saúde Hautio iha munisípiu Ainaro, tanba sentru saúde refere hala’o atendimentu ba suku tolu hanesan Nuno-Moge, Mausiga, Mulo ho nia aldeia 21 no nia populasaun hamutuk 3.000-resin.
Sentru saúde ne’e iha médiku ida (1), enfermeiru na’in-lima (5), pateira na’in-haat (4), farmasista na’in-rua (2), analista laboratóriu na’in-rua (2), saúde públiku na’in-tolu (3), nutrisionista na’in-ida (1), asistente malária na’in-ida (1), pesoál seguransa na’in-rua (2) no parte limpeza nian iha na’in-rua (2).
Atendimentu ne’e maioria rejista pasiente sira iha segunda no kuarta, no pasiente ho moras predominante mak infesaun vias respiratóriu aguda (IRA), diareia no moras kulit.
Entretantu, iha ativiade fiskalizasaun ne’e, membru deputadu komisaun refere observa katak sala laboratóriu iha sentru saúde ne’e mós kloot tebes.
“Sala maternidade, udan-been tama no halo plafon sira dodook hotu. Iha tinan 2024, sentru saúde Hautio rejista konsulta ANC hamutuk 163, inan isin-rua ne’ebé simu suplementu 21, inan post-natal ne’ebé simu suplementu 13 no partu iha fasilidade saúde sia (9),” relatóriu ne’e haktuir.
Enkuantu, iha tinan 2024, postu saúde Mausiga rejista konsulta ANC hamutuk 26 no inan isin-rua ne’ebé simu suplementu iha ida 91).
Iha tinan ne’e, postu saúde Dare/Mulo rejista konsulta ANC hamutuk 70, inan isin-rua ne’ebé simu suplementu 13, inan post-natal simu suplementu hitu (7), partu iha fasilita saúde ida (1) no partu iha uma ne’ebé hetan asisténsia husi pesoál saúde iha rua (2).
Kona-ba ekipamentu médiku ne’ebé disponível hanesan partu set ho kuantidade neen (6), hecting set ho kuantidade haat (4), termómetru ho kuantidade haat (4), doppler ho kuantidade ida (1), suction ho kuantidade tolu, ambu bag kiik no boot ho kuantidade haat (4), abortus set ho kuantidade ida (1), IUD set ho kuantidade ida (1) no implant set ho kuantidade ida (1), ba ekipamentu sira-ne’e hotu ho kondisaun di’ak.
Kona-ba transporte, iha karreta multifunsaun ida (1) ne’ebé iha prosesu manutensaun no motorizasaun rua, iha programa imunizasaun ba labarik sira iha área remota profisionál saúde utilia de’it motorizada privada, ho limitasaun transporte difikulta mós implementasaun programa SISCA no promosaun saúde.
Enterntatu, relatóriu fiskalizasaun komisaun F nian ne’e, iha reuniaun plenária komisaun permanente semana kotuk, meza PN halo ona distribuisaun no haruka mós kópia ba parte Govern, nune’e liuhusi entidade tutela hodi bele tau atensaun.
Jornalista : Nelson de Sousa
Editór : Cancio Ximenes
