DILI, 29 jullu 2024 (TATOLI)—Administrasaun Universidade Nasionál Timór-Lorosa’e (UNTL) planeia ona atu harii morru protesaun iha Hera, iha tinan 2025 tanba morru ezistente hahú a’at daudaun.
“Ita mós haree parte ida-ne’e, ita hakarak fatin ne’e tenke protejidu nune’e animál labele tama-sai maibé presiza haree mós orsamentu. Ita iha planu atu prepara no hadi’a morru protesaun ba UNTL Hera,” Pro-Reitór ba Asuntu Dezenvolvimentu Institusionál iha UNTL, Lélis Gonzaga Fraga, informa ba Agência Tatoli, iha ninia knaar fatin, UNTL sentrál, segunda ne’e.
Iha sorin seluk, ekipa foin haree no hadi’a eletrisidade, enkuantu ba bee-moos iha hela.
Nune’e mós, Reitór UNTL, João Martins, hateten, kestaun morru nafatin konsidera maibé daudaun sei kompleta uluk infraestrutura seluk tanba iha ona fakuldade foun.
“Ami tenke foka uluk lai oinsá atu konstrui infraestrutura. Morru ne’e mós sai preokupasaun ida ba ita maibé agora hanoin oinsá alastra saladeaula ba fakuldade foun sira, ida-ne’e depende ba Orsamentu Jerál Estadu,” nia tenik.
Notísia relevante : Jerente eskola labele kontrola estudante tanba morru protesaun a’at
Jerente sira iha UNTL propoin ona harii morru protesaun maibé seidauk hetan aprovasaun, maibé iha tinan 2025 sei kontinua submete proposta ba Governu.
“Espera katak bele aprova tanba sai ami-nia preokupasaun hotu tanba animál tama hodi estraga jardín no konstrusaun sira iha laran,” João Martins, dehan.
Nune’e, Reitór fó hanoin ba estudante sira hodi mobiliza malu hodi halo morru provizóriu.
“Ita la presiza morru neʼebé iha parade,
enkuantu ita-nia orsamentu la to’o, maibé halo ho ai ruma nune’e satan animál labele tama,” nia sujere.
Jornalista : Osória Marques
Editora : Julia Chatarina
