DILI, 24 jullu 2024 (TATOLI)–Adjuntu Diretór Eskola Ensinu Sekundariu Jerál (ESJ) Fitun Naroman Timor-Leste (FINANTIL), Sabino Ernesto, preokupa ho morru protesaun eskola ne’ebé mak a’at ona tanba difikulta sira atu kontrola estudante bainhira iha problema ruma.
“Morru eskola nia ne’e sai problema ba ami tanba morru ne’ebé daudaun haleu eskola ne’e monu hotu ona, entaun alunu balun kuandu komete krime ruma ami buka, sira haksoit sai husi morru bá tama tiha komunidade sira-nia uma, entaun ami buka la hetan ona,” Sabino Ernesto informa iha ninia knaar fatin, Ai-mutin, kuarta ne’e.
Morru protesaun ne’e kleur ona, tanba ne’e la garante seguransa ba iha estudante sira.
“Dalaruma bainhira labarik sira fuma sigaru iha ne’e, ita bolu no duni ne’e sira halai sai fali husi morru ne’ebé a’at, entaun ita difísil tebes atu kontrola. Tanba ne’e, husu ba Ministériu Edukasaun atu tau atensaun mós ba morru protesaun eskola, tanba eskola ne’e Governu nian ne’ebé Governu presiza tau atensaun,” nia tenik.
Notísia relevante : EBF Maluru enfrenta menus sala aula no laiha morru protesaun
Eskola ESJ Finantil iha estudante hamutuk 1.700, profesór 67, no saladeaula hamutuk 18.
Diretór Nasionál Infraestrutura no Edukativu iha ME, Hélio Lopes, hateten, morru protesaun ne’e Ministériu tau ona iha planu maibé sei la sai prioridade atu rezolve urjénsia tanba eskola barak mak sei menus fasilidade hanesan kadeira, meza, saladeaula, bee-moos no seluk tan.
“ME sei konsidera morru protesaun iha tinan orsamentu tuir mai, eskola barak mak presiza morru maibé ita-nia orsamentu konsentra ba fasilidade, saladeaula, no sala profesór nian. Ita fó instalasaun bee moos ba eskola sira no harii dapur. Ita labele halo uluk konstrusaun morru tanba iha eskola balun presiza tebes saladeaula, entaun ita responde lai buat hirak ne’e para estudante sira iha kondisaun ida ne’ebé di’ak hodi partisipa iha ensinu aprendizajen. Tanba ne’e, ita halo prioridade hirak ne’e fazeadamente, agora ita konsentra ba fasilidade importante sira iha kondisaun ne’ebé mínimu molok ita hakat ba konstrusaun morru,” Diretór Hélio, tenik.
Jornalista : Osória Marques
Editora : Julia Chatarina
