DILI, 30 jullu 2024 (TATOLI)–Centro Nacional Chega, Institutu Públiku (CNC, I.P, sigla portugés) hamutuk ho Ministériu Ensinu Superiór, Siénsia no Kultura (MESSK), tersa ne’e, realiza formasaun ba dosente sira iha universidade kona-ba matéria haat.
“Formasaun ida-ne’e nu’udar etapa dahuluk ne’ebé Centro Nacional Chega halo eleborasaun ba kurríkulu ensinu superiór, liu-liu ba matéria haat hanesan istória, direitu umanu, edukasaun ba paz no justisa tranzitóriu. Matéria haat ne’e la’ós Jerál maibé matéria ne’ebé kontestualiza ho situasaun Timor no matéria transversál maibé desizaun husi dosente iha universidade sira. Hotu-hotu hatene ensinu superiór sira iha Timor ne’e maioria seidauk iha matéria haat ne’e. Entaun, parseiru ne’ebé sentru CNC halo ho Ministériu Ensinu Superiór Siénsia no Kultura husu ba CNC atu elabora kurríkulu ida-ne’e,” Diretór Ezekutivu CNC, Hugo Maria Fernandes, informa iha salaun CNC, Balide.
Notísia relevante : CNC, I.P no FDCH asina akordu apoia subsídiu ba bolseiru 15
Matéria haat ne’e la’ós obrigatóriu tanba lei báziku ensinu superiór ne’e MESSK labele impoin kurríkulu ba universidade sira, tanba universidade iha autonomia atu kria mesak sira-nia kurríkulu maibé ohin iha ne’e ensinu superiór iha vontade atu hanorin.
“Ita hahú elebora iha tinan kotuk no iha fulan-rua liubá, ita finaliza ona módulu ne’e no hetan ona apresiasaun husi ministru. Entaun, ohin fó formasaun ba dosente sira husi Universidade Nasionál Timor-Lorosa’e (UNTL), Universidade de Dili (UNDIL), Universidade da Paz (UNPAZ), Institutu Ensinu Filozofia Teolojia, no Institutu São João Brito,” nia informa.
Formasaun loron-haat hahú ohin ne’e nu’udar introdusaun ida hodi aban bain-rua formandu sira sai formadór hodi hanorin iha sira-nia universidade, no karik aban bainrua universidade seluk iha interrese maka sira mós bele fó formasaun.
Formandu sira-ne’e la’ós dosente foun no sira iha ona kolaborasaun ho CNC durante ne’e.
Formadór ba formasaun husi profesora Marisa Ramos Gonçalves husi Coimbra Portugal, ne’ebé hetan apoiu mós husi Diretór Ezekutiva AJAR.
Partisipante husi UNDIL, Cesaltina Ângela, dehan, formasaun loron-haat ne’e sufisiente ona hodi elabora módulu sira ba matéria haat ne’e, nune’e bele prepara ba prosesu aprendizajen iha universidade.
“Matéria istória ami inklina ona iha ami-nia kurríkulu iha departamentu relasaun internasionál nian. Ida-ne’e ami implementa iha tinan kotuk, espera katak la’ós ida-ne’e de’it maibé kontinua beibeik atu hametin liután ami-nia kapasidade ba elaborasaun ba módulu,” nia tenik.
Atuál Dosente iha departamentu relasaun internasionál iha UNDIL, konsidera formasaun ida-ne’e bele sai bukae ida hodi hasa’e sira-nia koñesimentu oinsá bele hanorin iha universidade.
“Ami-nia esperansa husi formasaun ida-ne’e mak ami bele hetan esperiénsia no bukae di’ak liután ba ami-nia prosesu aprendizajen iha universidade,” nia katak.
Jornalista : Osória Marques
Editora : Julia Chatarina
