PN husu ministériu sira implementa Lei Protokolu Estadu

DILI, 30 jullu 2024 (TATOLI)—Prezidente Komisaun B trata asuntu Negósiu Estanjeiru no Defeza ho Seguransa iha Parlamentu Nasionál (PN), Domingos da Costa ‘Deker’, husu minstériu sira hotu atu implementa Lei Protokolu Estadu ne’ebé órgaun lejislativu ne’e aprova no hetan ona promulgasaun husi Prezidente Repúblika (PR) no daudaun tama ona vigór.
Notísia Relevante: PN aprova projetu-lei Presidénsia no Protokolu Estadu iha finál global
“Ha’u hakarak fó lembra ba Governu, atu hahú uza Lei Protokolu Estadu, lei ne’ebé aprovadu (iha PN) no promulgadu (husi Prezidente Repúblika), válidu hahú husi loron 01 fulan-jullu. Husu ba governante sira atu orienta ka fó hanoin ba protokolu sira husi ministériu hotu-hotu, halo leitura ba lei ne’e hodi kompreende oinsá mak sira organiza eventu sira,” nia hato’o liuhusi reuniaun plenária komisaun permanente iha Parlamentu Nasionál, tersa ne’e.
Tanba, nia dehan, Timor-Leste durante tinan 20-resin eventu sira-ne’ebé hala’o iha rai-laran dalabarak la tuir entidade sira-nia nível, nune’e lei ida-ne’e ninia objetivu dahuluk mak regula organiza eventu nasionál no internasionál ka ofisiál sira.
Vise Ministru ba asuntu Parlamentu, Adérito Hugo da Costa, rejista ho sériu atu husu ba ministériu kompetente prinsipalmente rua iha kontestu ida-ne’e hanesan Ministériu Administrasaun Estatál (MAE) ho Ministériu Negósiu Estranjeiru no Kooperasaun (MNEK) atu tau atensaun ba implementasaun Lei Protokolu Estadu ne’ebé tama ona vigór.
“Lei ne’e mai rasik husi PN ho Governu partilla, nune’e ohin loron lei ne’e tama em vigór ona, Governu sei tau atensaun ba ida-ne’e liuliu iha MAE ne’ebé sempre sai komisaun organizadora ba eventu sira nasionál ho mós internasionál. Teknikamente ho dokumentu sira-ne’ebé iha ho apoiu husi MNEK ninian tama iha efetividade koordenasaun, nune’e ita hamenus dezentendimentu no deskontentamentu iha eventu sira-ne’ebé ita selebra ne’ebé hatudu ita seidauk profisionál iha koloka entidade sira relevante, entermu protokolu Estadu ninian iha fatin ne’ebé apropriadu tuir lei,” nia hateten.
Nune’e, Governu agradese ho esforsu PN liuliu komisaun B konsege ohin loron TL iha ona Lei Protokolu Estadu ne’ebé bele guia ema hotu iha nível nasionál, munisípiu no postu sira ba selebrasaun sira tuir mai.
Hanesan iha tinan ne’e, Timor-Leste sei komemora loron konsulta popular ba da-25 (30 agostu 1999-30 agostu 2024) ne’ebé sei komemora iha territóriu tomak, aleinde ohin loron Governu sentrál konsentra hela ba komisaun organizadora ba simu vizita Amu Papa Francisco, nune’e eventu sira-ne’e sei uza Lei Protokolu Estadu.
Jornalista : Nelson de Sousa
Editór : Cancio Ximenes

