DILI, 30 jullu 2024 (TATOLI)–Jerente empreza JOVA Construction Unipesoál, Lda, Jaime D.S Gusmão, hateten husi hahú no rekomendasaun sira-ne’ebé Governu no igreja liuhosi ekipa vatikanu nian fó pedidu ba halo reabilitasaun ba Sentru Konvensaun Dili (CCD) ne’e, empreza halo kompletu hotu ona no agora atinje ona 100%.
Notísia Relevante: Reabilitasaun CCD atinje 75%
“Agora ami konklui de’it ona, rekomendasaun ikus ne’e mós termina hotu ona. Totál obra reabilitasaun ne’e atinje ona 100%, hahú husi inisiu no to’o rekomensaun ne’ebé igreja no Governu aprezenta ba ami,” Jerente empreza JOVA Construction Unipesoál, Lda, ne’e hateten ba Agência TATOLI, iha CCD Merkadu Lama, Dili, tersa ne’e.
Nia esplika, rekomendasaun ikus ba reabilitasaun uma rua ne’e mós hotu ona, tanba empreza mós reabilita no pinta edifisiu rua truka tapeti, instala mós toilet ba feto no mane.
Empreza mós halo instalasaun ba uma rua ne’e hanesan instala eletrisidade, monta Air Conditioner (AC) no hadi’a mós plafon uma nian.
Tuir nia, iha konkluzaun ba obra reabilitasaun ne’e empreza agora halo hela limpeza jerál ba iha edifísiu no aredór sira hodi haree no ovserva bainhira iha fallansu ruma.
“Agora, ami haree foer ruma iha pinta, hare bee sira-ne’ebé instala ba iha edifisiu no aredór sira. Iha loron hirak tuir mai, dadaun ne’e ami sei halo limpeza jerál de’it ona,” nia hateten.
Rmpreza sei entrega obra reabilitasaun ba Governu iha semana oin, maibé hein mós ekipa inspesaun Governu nian, molok sira entrega obra ne’e ba Governu.
“Ami sei entrega termu de entrega ba iha Governui iha segunda-feira hanesan ne’e,” nia dehan.
Jornalista : Jesuína Xavier
Editór : Cancio Ximenes
