DILI, 30 jullu 2024 (TATOLI) – Xefe Estadu Timor-Leste, José Ramos Horta ho Prezidente Republika Popular Xina, Xi Jinping, sai sasin ba asinatura akordu kooperasaun entre Governu Timor-Leste ho Xina ne’ebé reprezenta husi Ministru Negósiu Estranjeiru no Kooperasaun (MNEK) Bendito Freitas ho Komisaun Reforsa Dezenvolvimentu Nasionál Xína, Zhen Shanjie, kona-ba “Belt and Road Indicative”.
Hafoin akordu, Ministru Bendito Freitas konsidera, akordu Belt and Road Indicative ne’e importante tebes, atubele garante servisu parseria ho Xina kona-ba konektividade, dezenvolvimentu infraestrutura no seluk tan.
Notisia relevante:Ajénsia Notisioza TATOLI no China Media Group asina akordu kooperasaun iha Xina
“Prinsipalmente kona-ba akordu Belt and Road importante teb-tebes atu bele garante servisu hamutuk parseria ho Xína kona-ba konektividade, dezenvolvimentu setór infraestruturas nian ne’ebé sai hanesan prioridade Governu Xinés nian, ne’ebé inisiativa ne’e hahú husi Prezidente Xí Jinping nian hahú iha 2013,” refere nota ne’ebé Agência TATOLI asesu husi media MNEK, ohin.
Belt and Road Indicative (BRI) daudaun ne’e, sai ona hanesan programa mundiál ne’ebé liga ba konektividade global, dezenvolvimentu infraestrututas no telekomunikasaun nian.
Aleinde ne’e, Ministru Bendito Freitas mós asina tan akordu rua seluk mak hanesan, ho Ajénsia Dezenvolvimentu Kooperasaun Internasionál Xína, Lou Zhaohui kona-ba, kooperasaun téknika ekonómika no mós ho Administrasaun Aviasaun Sivíl Xína sobre Akordu Servisu Aero entre nasaun rua.
Akordu importante seluk ne’ebé Timor-Leste ho Xína asina mós mak iha área sira hanesan, promove implementasaun husi inisiativa dezenvolvimentu global no promove projetu infraestrutura kooperasaun xineza nian, akordu kooperasaun ho Ministru Agrikultura no Asuntu Rurál Xína, HanJun sobre konsolidasaun no kooperasaun agríkola entre nasaun rua.
Asinatura ba akordu sira-ne’e, iha ámbitu vizita Estadu husi Prezidente Repúblika, José Ramos-Horta nian ba Xína, hodi haforsa relasaun diplomátika entre rai-rua ne’e.
Notisia relevante:TL-Xina selebra akordu kooperasaun iha área investimentu ekonomia dijitál no dezenvolvimentu verde
Jornalista: Hortencio Sanchez
Editór: Florencio Miranda Ximenes
