Xefe Governu orienta Embaixadór Roberto Soares asegura interese nasaun
DILI, 31 jullu 2024 (TATOLI) – Primeiru-Ministru (PM), Kay Rala Xanana Gusmão, husu ba Embaixadór Extraordináriu no Plenipotensiáriu Timor-Leste bá Repúblika Indónezia (RI), Roberto Sarmento de Oliveira Soares atu tane aas no asegura interese nasaun nian.
“Orientasaun ne’ebé ha’u simu hosi Primeiru-Ministru mak, servisu halo didi’ak hodi asegura interese nasaun nian, projeta másimu imajen kualidade no integridade atu hatudu ita nasaun ki’ik maibé bele hetan respeita iha mundu no rejiaun. Maske ita rai ki’ik maibé ita mós iha kapasidade potensialidade ba promosaun pás,” Embaixadór Roberto hateten, iha Palásiu Governu foin lalais ne’e.
Diplomata ne’e rekoñese katak, Timor-Leste ho Indonézia iha relasaun espesiál tebtebes kona-ba progresu rekonsiliasaun, amizade oinsá atu hakle’an no haforsa liután relasaun entre ema ho ema, hanesan nasaun ida ne’ebé besik liu ho interrese ne’ebé bo’ot tebtebes.
Timor-Leste mós iha relasaun diplomátika ho Indonézia desde kedan restaurasaun independénsia iha tinan 2002, estabelese ona kooperasaun oioin iha área seguransa, polítika, ekonómiku, sósiu-kulturál no seluk-tán, nune’e Roberto promete sei esforsu atu kontinua nafatin kooperasaun hirak ne’e tanba Indonézia hanesan apoiante prinsipál adezaun Timor-Leste bá ASEAN.
Durante mandatu, Embaixadór Roberto Soares kompromete servisu makaas atubele hetan solusaun ne’ebé di’ak liu ba kestaun soberania, la’ós de’it liga ba fronteira rai-maran nian, maibé mós liga ba fronteira tasi no futuru fronteira aérea.
Prezidente Repúblika José Ramos Horta fó pose ba Roberto Sarmento de Oliveira Soares nu’udár Embaixadór Estraordináriu no Plenipotensiáriu Timor-Leste bá Indonézia iha Palásiu Prezidensiál Bairru-Pité, segunda (22/07/2024).
Notisia relevante:Xefe Estadu fó pose ba Roberto Soares nu’udar Embaixadór TL bá Indonézia
Jornalista: Hortencio Sanchez
Editór: Florencio Miranda Ximenes
