Benefisiáriu bolsa parsiál 1.690 konkorda asina kontratu
DILI, 31 jullu 2024 (TATOLI)–Benefisiáriu hamutuk 1.690 ba bolsa parsiál konkorda ona asina kontratu ne’ebé Fundu Dezenvolvimentu Kapitál Umanu (FDCH, sigla portugés) oferese atu selu sira-nia propina.
“To’o horiseik hamutuk 1.690 mak fila hodi rejistu fali ona. Sira ne’ebé foin daudaun ba halo manisfestasaun hasoru ha’u ne’e mós mai husu ona deskulpa no sira asina fali ona kontratu. Ha’u gosta sira-nia asaun manifestasaun ne’e tanba ida-ne’e prosesu aprendizajen maibé sira-nia futuru ne’e importante. Governu kuandu deside buat ruma ne’e iha razaun ne’ebé mak forte,” Diretór Ezekutivu FDCH, Júlio Aparício, hateten iha salaun Ministériu Transporte no Komunikasaun (MTK), Caicoli, kuarta ne’e.
Durante ne’e parte FDCH esplika ba benefisiáriu kona-ba desizaun ne’ebé Governu foti hodi revoga bolsa hakbiit.
“Maibé tanba sira la komprende entaun sira halo fali manifestasaun. Ne’ebé daudaun ne’e sira lubuk ne’ebé fila ona mai asina kontratu ne’e ita nafatin simu tanba osan ne’e Estadu no povu nian,” nia akresenta.
Notísia relevante : FDCH konvida benefisiáriu bolsa parsiál asina kontratu iha loron 01-31 jullu
Nune’e, Diretór Ezekutivu espera benefisiáriu hamutuk 3.030 sei mai hotu asina kontratu nune’e sira bele hala’o estudu ho di’ak, tanba nu’udar estudante tenke hatene sentidu Estadu hahú agora, responsabilidade ba Estadu no osan nune’e mós responsabilidade ba nia-an hodi estuda, tanba agora la’ós ko’alia de’it no husu de’it ba Governu.
“Agora ita preokupa ne’e mak ita luta to’o sira hetan fali bolsa parsiál, se lae sira la hetan hotu bolsa parsiál. Tanba revogasaun katak hakotu ka para totál, ida-ne’e desizaun Governu, tanba Governu hatene halo planu, halo programa no nia mak hatene atu halo saida ba rai ida-ne’e. Ne’ebé husu ba ha’u-nia alin sira tempu agora ne’e estuda hodi aproveita oportunidade barak ne’ebé iha,” nia enkoraja.
Hafoin benefisiáriu sira asina tiha kontratu, FDCH sei nafatin akompaña durante fulan-neen to’o tinan-ida.
“Agora ita hahú ho kontratu no FDCH sei nafatin akompaña durante fulan-neen ba tinan-ida, karik mai mak valór nafatin la to’o, hakarak ka lakohi ne’e tenke hapara. Ne’e sira mak lakohi duni no sira mak la preokupa ba sira-nia futuru. Tanba bolsa ne’e merese ba ema ne’ebé matenek no badinas. Tanba vizaun FDCH nia mak sai nu’udar entidade dezenvolvimentu kapitál ka rekursu umanu ne’ebé forte hodi kontribui no reforsa dezenvolvimentu Timor-Leste haktuir objetivu programa estratéjiku dezenvolvimentu nasionál,” nia tenik.
Programa bolsa parsiál bazeia ba diploma ministeriál númeru 78/2021 10 novembru relasiona ho rejime atribuisaun bolsa estudu ba frekuénsia iha territóriu nasionál no regulamentasaun pedidu individuál apoiu finanseiru ba estudu iha ensinu superiór akreditadu nasionál.
Programa ne’ebé oferese husi FDCH ne’e so fó apoiu de’it ba kustu propina estudante nian to’o konklui estudu no sei la kobre selu kustu sira seluk hanesan kustu moris, alojamentu no kustu didátiku.
Bolsa hakbiit kada bolseiru sei hetan kustu vida $120 kada fulan hodi kobre sira-nia alojamentu, transporte, alimentasaun no ekipamentu didátiku. Enkuantu, ba propina nian Governu sei transfere direita ba konta bankária universidade ne’ebé benefisiáriu sira hala’o estudu.
Jornalista : Osória Marques
Editora : Julia Chatarina
