DILI, 31 jullu 2024 (TATOLI)—Governu deside empreza responsável kontinua halo serbisu reabilitasaun ba estrada husi suku Wedaberec, aldeia Meti-Oan ba to’o postu administrativu Alas, munisípiu Manufahi.
Ministru Obra Públika, Samuel Marçal, informa, antes ne’e Governu foti desizaun haruka empreza retira husi ne’ebá maibé hafoin ida-ne’e Administradór postu administrativu Alas hamutuk ho ekipa sira seluk hanesan lian na’in no sira seluk mai Dili husu Governu labele hapara ka retira maibé fó tempu ba sira mak rezolve problema nu’udar Alas-oan.
“Ha’u kontente tanba ha’u rona katak komunidade ho parte impedimentu rezolve ona, ida-ne’e desizaun ne’ebé ita hotu nia esperasa sira bele kolabora malu ho empreza halo reabilitasaun estrada ne’e ho lais, tanba buat hotu la’ós ba ita maibé ba povu,” Ministru Samuel Marçal, hateten iha Palásiu Governu, Dili, kuarta ne’e.
Notísia relevante : Juventude-Estudante Alas husu Governu buka solusaun urjente rezolve Estrada Wedauberek
Projetu reabilitasaun estrada ne’e rasik daudaun empreza kontinua hala’o tanba sira buka ona soluasaun.
Reabilitasaun estrada husi suku Wedaberec, aldeia Meti-Oan to’o postu administrativu Alas, munisípiu Manufahi ho naruk kilómetru 23, ne’ebé hatuur ona fatuk dahuluk iha loron 14 juñu 2024.
Projetu reabilitasaun estrada Wedaberec bá postu administrativu Alas responsabiliza husi empreza internasionál Xina ho naran China Nuclear Industry 22nd Construction Co, Ltd ho totál orsamentu millaun $13,8.
Jornalista : Arminda Fonseca
Editora : Julia Chatarina
