DILI, 31 Jullu 2024 (TATOLI) – Ministériu Interiór (MI) sei aumenta forsa seguransa iha pontu entrada fronteira sira, iha ámbitu vizita Papa Francisco nian iha Timor-Leste, hodi garante seguransa ho másima.
“Ita haree asuntu seguransa iha fronteira ne’e sériu duni, tanba ne’e ita sei koloka tan númeru membru efetivu iha ne’ebá hodi garante seguransa iha vizita Papa nian mai ita-nia rain ne’e bele la’o ho di’ak”, Ministru Interiór, Francisco da Costa Guterres, hateten iha Palásiu Governu.
Aleinde aumenta membru iha pontu entrada sira, MI mós husu ona apoia husi Ministériu Administrasun Estatál (MAE) nian hodi orienta mós líder komunitáriu sira iha zona fronteira atu serbisu hamutuk ho polísia sira atu fó apoiu mós ba seguransa.
“Ita husu ona apoiu ba MAE atu orienta mós líder komunitáriu sira iha fronteira atu fó tulun ba polísia karik deskonfia buat ruma iha sira-nia bairru bele informa lalais hodi halo kedan intervensaun”, dehan.
Governante ne’e mós solisita ba UPF no Polísia Servisu Migrasaun iha fronteira atu kria liña komunikasaun ida di’ak ho autoridade lokál sira hodi halo diálogu ho komunidade relasiona ho vizita Papa Francisco.
Ministru ne’e garante katak seguransa iha fronteira la’o ho di’ak, tanba liña koordenasaun entre polísia no forsa seguransa sira di’ak tebes.
Relembra katak, atu garante seguransa iha ámbitu vizita Papa Francisco nian mai Timor-Leste, entre loron 09 no 11 Setembru, FALINTIL-Forsa Defeza Timor-Leste no Polísia Nasionál Timor-Leste formaliza tiha ona akordu operasaun konjunta ho naran “Pombu Mutin”.
Notísia relevante: PN husu Governu prepara kondisaun ba serbisu operasaun konjunta “Pombu Mutin”
Jornalista: Tomé Amado
Editora: Maria Auxiliadora
