DILI, 31 Jullu 2024 (TATOLI) – Servisu Migrasaun detein sidadaun estranjeiru na’in-37 ne’ebé serbisu iha bar no diskoteka sira, tanba viola vistu traballu.
Sidadaun sira ne’ebé kontra vistu traballu ne’e mai husi Indonézia iha na’in-23, Xina hitu, Kamboja rua, Tailándia tolu, Vietname ida no Filipina ida.
Diretór-Jerál Interinu Servisu Migrasaun, Juvinal Castelho, informa Migrasaun halo serbisu sira ne’e bazeia ba lei no orden ne’ebé hatuur iha lei númeru 30/2009 ne’ebé atribui kompeténsia ba Migrasaun hodi halo kontrolu ba movimentu sidadaun tama-sai no permanense iha Timor-Leste.
Husi kompeténsia ne’ebé fó ba Migrasaun hodi hala’o nia knaar ne’e mak iha loron 12 Jullu 2024 halo operasaun iha bar no diskoteka sira no konsege identifika sidadaun estranjeiru balun maka la obdese ba lei Timor-Leste nian.
Nia dehan sidadaun na’in-37 ne’ebé kontra vistu ne’e balun kumpre ona prosesu administrasaun no seluk sei iha hela prosesu identifikasaun.
Aleinde ne’e, Juvinal Castelho informa mós totál sidadaun sira ne’ebé tama-sai husi postu entrada iha fronteira hahú husi Janeiru to’o Juñu ne’e hamutuk 262.994, ne’ebé kompostu husi mane 130.431 no feto 132.563.
Husi númeru ema tama-sai iha fulan neen ne’e, parte Migrasaun identifika sidadaun 63 mak iha indísiu viola vistu traballu, tanba sira mai ho vistu turista depois hala’o serbisu iha Timor-Leste. Tanba ne’e, Migrasaun halo ona abandona voluntária ba sira, nune’e iha sidadaun estranjeiru hamutuk na’in-14 maka tama iha prosesu averiguasaun tanba iha ligasaun uitoan ba krime balun.
Junvinal Castelho esplika katak sidadaun ne’ebé halo violasaun ba vistu, Migrasun kondena sira ho Lei Migrasaun no Azilu númeru 11/2017 ne’ebé konsagra iha artigu 143, kondena ba pesoal ne’ebé hala’o violasaun ba vistu mínimu tenke selu multa ba Estadu Timor-Leste $200 to’o $1.000 no artigu 144 kondena ba empreza ne’ebé fasilita sidadadaun estranjeiru sira ne’e tenke responsabiliza hodi selu koima husi $700 to’o $2.000
Nune’e, parte Migrasun kontinua hala’o vijilánsia hodi aperta sidadaun estranjeiru sira ne’ebé viola vistu. Servisu Migrasau husu ba Komandu Polísia no autoridade lokál sira iha territóriu bainhira haree sidadaun estranjeiru sira kontinua halo vijilánsia iha bairru bele informa lalais ba Migrasaun hodi halo intervensaun.
Notísia relevante: Servisu Migrasaun notifika sidadaun Indonézia na’in-40
Jornalista: Tomé Amado
Editora: Maria Auxiliadora
