iklan

HEADLINE, SEGURANSA

Servisu Migrasaun notifika sidadaun Indonézia na’in-40

Servisu Migrasaun notifika sidadaun Indonézia na’in-40

Diretora-Jerál Servisu Migrasaun, Inspetór Xefe Polísia Adelaide da Rosa. Foto/MI

DILI, 06 janeiru 2024 (TATOLI) – Sidadaun Indonézia na’in-40 hetan notifikasaun husi Servisu Migrasaun no husi númeru ne’e na’in-13 halo prosesu abandonu voluntáriu husi país ho pena tinan tolu labele tama territóriu Timor-Leste, tanba viola vistu traballu.

“Iha janeiru tinan ne’e, ita prosesa delijénsia simples ba sidadaun estranjeiru na’in-40 husi nasaun viziña Indonézia tanba sira viola vistu”, Diretora-Jerál Servisu Migrasaun, Inspetór Xefe Polísia Adelaide da Rosa, hatete iha Ministériu Interiór, Caicoli, ohin.

Diretora-jerál ne’e esplika katak ba sidadaun estranjeiru na’in-13 ne’ebé Migrasaun haruka fila ne’e tanba laiha duni meiu atu kontinua sira-nian serbisu iha Timor-Leste no molok haruka sira fila maka Servisu Migrasaun Timor-Leste koopera ho embaixada Indonézia iha Timor-Leste hodi esplika uluk kestaun sidadaun na’in-13 nian, nune’e bele iha entendimentu di’ak ba malu.

Diretora-Jerál Servisu Migrasaun, Inspetór Xefe Polísia Adelaide da Rosa.

Sidadaun indonéziu na’in-13 ne’ebé haruka fila ona ne’e komete irregularidade tanba durante serbisu iha Timor-Leste ne’e laiha vistu traballu, maibé uza de’it mak vistu turista hodi serbisu. Sira ne’e Polísia Migrasaun ka’er iha Oé-Cusse hodi hala’o atividade negósiu ambulante hodi fa’an mina-morin. Sira-nian prosesu identifikasaun hahú iha loron 06 janeiru 2024 no haruka fila ona.

“Ba sidadaun estrajeiru na’in-27 seluk depois ita halo prosesu administrativa, sira kontinua legaliza sira-nian prezensa ho vistu ne’ebé adekuadu hodi nafatin hala’o sira-nian serbisu iha Timor-Leste, maibé Migrasaun kontinua prega multa ba sira”, informa.

Koima ne’ebé Migrasaun fó ba estranjeiru na’in-40 (maski na’in-13 fila ona, maibé aplika nafatin multa ba sira) ne’e kada ema selu $200 no soma hamutuk tenke selu ba Migrasaun rihun $8.

Dirijente Servisu Migrasaun ne’e salienta katak Timor-Leste la bandu sidadaun estranjeiru ida labele tama país, bainhira nia iha dokumentu adekuadu inklui iha empreza ruma maka garante sira-nian vida, maibé Migrasaun kontinua garante ba sira loron 30 tama ho vistu turista.

“Bainhira sira atu halo serbisu ruma iha Timor-Leste Migrasun iha tan tempu loron 30 hodi fó ba sira atu bele trata vistu traballu, nune’e molok sira-nian durasaun tempu vistu turista mate sira bele iha ona vistu traballu hodi garante sira-nian prezensa hodi serbisu iha país”, esplika.

Polísia Servisu Migrasaun kontinua halo operasaun bainhira sidadaun estranjeiru sira mak la kumpre Lei Migrasaun, sei hetan kapturasaun hodi lori bá halo prosesu tuir lei ne’ebé vigora.

Notísia relevante: Servisu Migrasaun koleta reseita millaun $2 iha 2023

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!