Reprezentante povu preokupa komunidade Bobonaro faan rai poténsia ba natar

DILI, 31 jullu 2024 (TATOLI)—Reprezentante povu iha uma fukun Parlamentu Nasionál (PN), liuhusi Deputadu KHUNTO, António Verdiál de Sousa, preokupa komunidade Bobonaro balun faan rai poténsia ba natar hodi nakfilak sai terrenu konstrusaun ne’ebé nakonu ho fatuk, rai-henek no konstrui uma.
Notísia Relevante: Governu presiza regula komunidade ne’ebé fa’an rai poténsia ba natar
“Hanesan Deputadu Bobonaro oan, ha’u haree situasaun realidade ba Maliana ita tama husi Nunura sa’e ba ne’e, iha liman loos no karuk, fatin uluk natar ne’e agora ema tau fatuk iha laran barak. Fatin sira-ne’e bele prodús hare, populasaun labele halo natar tanba irrigasaun aat,” nia hateten ba Agência TATOLI iha resintu Parlamentu Nasionál, kuarta ne’e.
Tanba ne’e, nia husu Governu liuhusi Ministériu Agrikultura, Pekuária, Peska no Floresta (MAPPF) atu tau prioridade hadi’a irrigasaun ne’ebé iha no halo konstrusaun foun ba irrigasaun hodi bele fasilita povu agrikultór halai natar.
Antes ne’e, Deputadu CNRT, Gabriel Soares, preokupa ho komunidade balun uza natar fatin hodi sai nakfilak sai terenu konstrusaun ruma ne’ebé nakonu ho fatuk, rai-henek hanesan iha parte Vemasse nune’e husu parte ezekutivu atu tau atensaun.
Antes ne’e, Prezidente autoridade munisípiu Bobonaro, Alexandrino Pires, husu Governu sentrál atu hasai diploma ministeriál no dekretu-lei ruma hodi bele regulariza komunidade ne’ebé faan rai ne’ebé poténsia ba natar fatin, tanba daudaun ne’e rai natar fatin iha parte Soso, Surikmas, Maliana nakfilak sai terrenu konstrusaun ne’ebé nakonu ho fatuk, rai-henek no uma.
Jornalista : Nelson de Sousa
Editór : Cancio Ximenes

