Governu presiza regula komunidade ne’ebé fa’an rai poténsia ba natar
BOBONARO, 23 jullu 2024 (TATOLI) – Prezidente Autoridade Munisípiu Bobonaro, Alexandrino Pires, husu Governu Sentrál atu hasai diploma ministeriál no dekretu lei ruma hodi bele regulariza komunidade ne’ebé fa’an rai ne’ebé poténsia ba natar fatin, tanba dadaun ne’e rai natar fatin iha parte Soso, Surikmas, Maliana nakfilak sai terrenu konstrusaun ne’ebé nakonu ho fatuk, rai-henek no uma.
Nia aprezenta kestaun referida ba Governu Sentrál atu halo intervensaun sedu, tanba komunidade kontinua transforma espasu produtivu ba terrenu konstrusaun iha futuru bele fó impaktu ba rezultadu produsaun hare menus.
Tuir nia, bainhira iha ona baze legál ruma, Autoridade Munisípiu Bobonaro sei ezekuta hodi la autoriza komunidade fa’an arbiru, tanba rai natar nu’udar terrenu produtivu ba agrikultór sira utiliza halo produsaun hare hodi sustenta ekonomia família no nasaun.
Notísia relevante: Lú Olo triste haree natar Maliana nakonu ho fatuk no rai-henek
“Ha’u ko’alia ona ho ministru, atu haree ona entre Justisa ho Estatál atu hasai ona diploma ministeriál ka dekretu lei, sobre funsaun ba rai-natar, sé mak sosa, o bele sosa, o halo nafatin natar, labele halo uma, labele muda nia funsaun, tenke halo nafatin natar,” nia hateten iha salaun Maria-Tapo.
Nia parte tau prioridade dahuluk ba setór agrikultura, ne’ebé daudaun ne’e halo ona irrigasaun iha parte Raegeren ba Raboanan no iha tempu badak Ministériu Agrikultura, Pekuária, Peska no Floresta sei halo reabilitasaun ba irrigasaun Maliana II hodi reativa fali natar ne’ebé abandona durante tempu naruk.
“Ita hakarak hasa’e volume produsaun, ita labele dependente demais ba foos importasaun, ita labele sai hamlaha iha ita-nia rai rasik, labele sai kiak ba ita-nia rai-mamuk rasik,” nia fó hanoin.
Domingos Perreira da Silva nu’udar joven, konkorda ho polítika Prezidente Autoridade Munisípiu Bobonaro, tanba Maliana iha poténsia ba natar ne’ebé hori uluk kedas koñesidu ho naran lumbung padi ka armazein foos, maibé agora natar barak mak abandona.
“Ita haree ikus-ikus ne’e natar fatin sira tún ba Soso nian ne’e nakfilak sai fatuk, rai-henek ho uma mak nakonu. Ha’u hanoin ita-nia Governu presiza halo intervensaun lalais sé lae, tinan lima mai tán ita haree Maliana ne’e la’ós matak, sai fali maran namlaek de’it ona, tanba espasu ba ema halo natar uma okupa hotu ona ne’e,” nia hateten.
Nia rekomenda ba governu kompetente iha tinan fiskál 2025 tenke tau osan boot liután hodi investe ba setór agrikultura nune’e bele motiva natar-na’in sira hasa’e produsaun hare kada époka atu bele redús dependénsia ba importasaun foos husi rai-li’ur.
Tuir dadus husi Diresaun Servisu Munisipál Agrikultura Munisípiu Bobonaro, rejista hare époka dahuluk tinan 2024 kuda iha rai ektare 3,504. ne’ebé kobre postu administrativu neen.
Notísia relevante: Governu orienta DSMA kontrola komunidade halo uma iha natar Maliana
Jornalista: Sérgio da Cruz
Editór: Evaristo Soares Martins
