BOBONARO, 07 fevereiru 2024 (TATOLI) – Vise Ministru Administrasaun Estatál (MAE), Jacinto Rigoberto, orienta Diretór Servisu Munisipál Agrikultura, Autoridade Munisípiu Bobonaro, atu halo servisu maka’as no halo koordensaun ho Diresaun Terras no Propriedade hodi kontrola komunidade sira-ne’ebé halo uma no butuk rahenek ho fatuk nakonu iha natar laran iha área Soso to’o ba Cabang Memo, postu administrativu Maliana.
Vise-Ministru Jacinto Rigoberto, hato’o asuntu ne’e iha nia diskursu ba serimónia pose ba estruturua foun Autoridade Munisípiu Bobonaro no administradór postu administrativu neen, iha Jináziu Maliana, kuarta ne’e.
Tuir nia, dezde uluk munisípiu Bobonaro liuliu postu administrarivu Maliana koñesidu ho naran lumbung padi, maibé oras ne’e terrenu produtivu hirak-ne’e balu nakfilak ona sai uma konstrusaun boot sira.
Notísia relevante: Lú Olo triste haree natar Maliana nakonu ho fatuk no rai-henek
“Agora natar sira uma mak tama daudaun ona, rai mamuk sira iha foho leten ne’ebá ne’e husik abandonadu hela, ida-ne’e papél diretór agrikultura nia servisu hamutuk ho terra propriedade atu asegura ida-ne’e, se la natar sira-ne’e sai uma hotu, depois populasaun sira sosa de’it foos hosi rai-li’ur mai,” nia hateten iha intervensaun
Tuir dadus Sensu Agrikultura munisípiu Bobonaro iha poténsia ba setór agrikultura iha área kultiva natar hamutuk ektare 7,663.
Notísia relevante: Komunidade Tapo-Memo husu Governu kria lei separa rai produtivu-konstrusaun
Jornalista: Sérgio da Cruz
Editór: Evaristo Soares Martins
