DILI, 31 jullu 2024 (TATOLI)–-Aeroportu Navegasaun Aérea Timor-Leste (ANATL) halo kooperasaun ho Fundu Dezenvolvimentu Kapitál Umanu (FDCH, sigla portugés) hodi fó bolsu estudu ba timoroan na’in-29 hodi bá hala’o estudu ho nível diploma 3, iha Indonézia.
“Estudante 29 ne’e sei bá Indonézia hala’o estudu iha área Air Traffic Controller (ATC), Air operation, Aviation Security, Bombeiros fair Faiting, nomós ba navegasaun. Teste ida-ne’e ita serbisu hamutuk ho FDCH no politékniku husi Indonézia, no ohin ita fó teste ba ita-nia oan sira hamutuk 52, ne’ebé na’in-29 mak selesionadu hodi bá hala’o estudu iha Indonézia,” Prezidente Konsellu Administrasaun ANATL, Romualdo da Silva, informa iha salaun Ministériu Turizmu no Ambiente, Caicoli, kuarta ne’e.
Notísia relevante : Bolseiru 10 husi ANATL sei dezloka bá Indonézia hafoin hetan pasaporte
ANATL atribui bolsa estudu tinan ne’e ba dahaat ona, ne’ebé antigu bolseiru balun serbisu ona no balun kontinua hela sira-nia estudu.
“Sira hirak-ne’e sei ba hala’o estudu iha Palembang, Sumatra (Curup) no Surabaya, ne’ebé teste hotu ona, no rezultadu ne’e sira rona kedas sé mak liu no sé mak la liu. Uta hahú trata fali sira-nia dokumentu viajen,” nia akresenta.
Bolseiru sira hafoin ramata diploma 3, sei serbisu no bainhira iha oportunidade sei kontinua fali sira-nia estudu iha nível lisensiatura nian.
Bolseiru na’in-29 sei hala’o estudu durante tinan-tolu no sei hela iha koléjiu.
Diretór Ezekutivu FDCH, Júlio Aparício, hateten, programa ne’e ANATL nian, maibé fundu mai husi FDCH.
“Entaun ita serbisu hamutuk atu garante transparánsia, selesaun ida-ne’e mós la’ós ANATL mesak maibé ho FDCH, entaun ami forma ekipa juri, hafoin halo selesaun. Tanba ne’e buat hotu-hotu ami halo ne’e transparánsia,” nia informa.
Parte FDCH nia esperansa katak transparánsia no garante kualidade tanba buat hotu tenke liuhusi prosesu ne’ebé justu no loloos. Tanba timoroan ne’ebé kapasidade, kualidade no selesionadu ba hala’o estudu iha rai-li’ur ne’e sei fila hodi kontribui ba prosesu dezenvolvimentu iha Timor-Leste.
Kada fulan kada bolseiru hetan transferénsia $450 ba nesesidade sira durante hala’o estudu.
Jornalista : Osória Marques
Editora : Julia Chatarina
