DILI, 01 agostu 2024 (TATOLI)—Deputadu membru komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN) no Deputadu CNRT, Natalino dos Santos, husu autoridade kompetente presiza halo kontrolu másimu ba sidadaun estranjeiru ho vistu turista mai hala’o fali serbisu iha Timor-Leste.
Notísia Relevante: Migrasaun detein sidadaun estranjeiru na’in-37 ne’ebé viola vistu traballu
“Husu autoridade kompetente liuhusi Ministériu Interiór (MI), Komandu Jerál PNTL no unidade imigrasaun atu haree asuntu ne’e importante, tanba ne’e lamenta tebes bainhira sira uza vistu turista depois mai hala’o fali serbisu iha ne’e, ida ne’e kontra lei,” Nia hateten ba Agência TATOLI iha resintu Parlamentu, kinta ne’e.
Nune’e, nia dehan, serbisu imigrasaun presiza másimu haree sidadaun estranjeiru sira ho vistu turista iha liña fronteira bainhira tama mai territóriu to’o loron sira fila, no se la fila tenke fó informasaun ba parte kompetente atu kontrola.
Ba parte Sekretária Estadu Formasaun Profisionál no Empregu (SEFOPE) liuhusi inspesaun traballu atu tau atensaun mós.
Aleinde ne’e, ba prezidente autoridade munisípiu Dili, líder komunitária mós iha kompeténsia atu halo identifikasaun ba populasaun sira iha Dili ne’ebé iha kada bairru no suku iha loza no fatin ne’ebé loke serbisu presiza halo kontrolu, se sidadaun estranjeiru ne’ebé mai ho vistu turizmu ninia objetivu mai atu pasear la’ós halo serbisu.
Nia bolu atensaun mós ba empreza sira-ne’ebé mak utiliza sidadaun estranjeiru ho vistu turista hodi hala’o serbisu fó sansaun ba empreza sira ne’e.
Tanba, tuir nia, sidadaun estranjeiru mai ho vistu turista mai serbisu fali iha Timor-Leste ne’e taka dalan ba timoroan sira-ne’ebé hala’o kna’ar hanesan traballadór ne’e problema boot.
“Ida-ne’e, kontra lei no fó sansaun ba sira hodi deporta fila ba sira-nia rain,” nia dehan.
Jornalista : Nelson de Sousa
Editór : Cancio Ximenes
