DILI, 01 agostu 2024 (TATOLI)–Governu liuhusi Autoridade Munisípiu Dili (AMD) no Ministériu Administrasaun Estatál (MAE) hamutuk ho Federal Insurance Timor S.A no Western Union, kinta ne’e, lansa kompetisaun “Dili Hamurak” (Hakmatek, Moos no Dame) ba suku 31 iha munisípiu Dili hodi komemora Dili Day ba da-255.
Notísia Relevante: Dili Day ba dala-254 ho lema Dili “MOS” no “BERTAISS”
Jerente ba negósiu husi Western Union, Ventura Maia, hateten kompetisaun ne’e kompostu husi halo limpeza iha suku, hakerek múzika konstitui ho fraze “Dili Murak” no Tik Tok ba labarik sira ho idade tinan 10 inferiór ne’ebé iha mensajen “Dili Murak”.
“Rekezitu sira ba iha kompetisaun suku mós mak hanesan so’e lixu iha lixeiru. Ba suku ne’ebé pertense ba tasi ne’e, hamoos tasi ibun no mota laran. Uma ne’ebé iha kintal ruma tenke kuda duut ka ai-oan ruma. Hamatak uma ho rega duut sira ne’ebé kuda. Hamoos bee-dalan públiku. Bairru dame iha suku, atu Dili sai matak no mudansa iha família,” Ventura Maia hateten liuhusi konferénsia imprensa konjunta, iha Caicoli.
Iha kompetisaun ida-ne’e, nia dehan, manan-na’in sira sei hetan prémiu ba ekipamentu limpeza nian no ida-ne’e ba manan-na’in sira-ne’ebé prienxe kriteriu kompetisaun.
Ekipa juri, nia dehan, kompostu husi pesoál sira iha Federal Insurance Timor S.A no Western Union, AMD no Ministériu Administrasaun Estatál.
Diretora Federal Insurance Timor S.A, Perose Su’a, hateten klasifiksaun ba iha kompetisaun ne’e mak hanesan excelente, di’ak, sufisiente no ladi’ak-liu ne’e, mak ekipa juri sei fó avaliasaun ba suku kompetetivu sira iha munisípiu Dili.
“Iha tinan ida-ne’e, ami bele hetan oportunidade di’ak tebe-tebes bele envolve hamutuk ho Governu liuhusi Autoridade Munisípiu Dili mak organiza atividade ne’e, atu komemora loron Dili nian. Ami kontentente tebes,” Perose Su’a hateten liuhosi konferénsia imprensa konjunta, iha Caicoli.
Reponsável ne’e hateten, kompetisaun ba atividade ne’e atu komunidade hatoman “Dili Hamurak” no parte ida sai hanesan preparasaun ida ba vizita santu Padre Francisco iha 09-11 setembru 2024 ne’e.
“Atu mantein sidade Dili sai fatin moos, ida-ne’e nakait ba slogan Munisipiu Dili nian kona-ba Dili Hamurak katak Hakmatek, Moos no Dame,” nia dehan.
Diretora ne’e hateten, kompetisaun ba iha hakerek múzika ne’e, partisipante sira-ne’ebé hakerek múzika tenke bazeia nafatin ba slogan Dili Hamurak ne’ebé sei hahú iha 01 agostu to’o 30 agostu 2024 ne’e, ekipa juri hetan ona múzika ne’e atu juri sira selesiona no bele toka iha komemoraaun Dili Day iha 10 outubru.
Nia dehan, iha kompetisaun Tik Tok ne’e mós mai ho nia tema sei lasees husi slogan Dili Hamurak ne’ebé sei iha manan-na’in tolu (3) iha kada kategoria kompetisaun.
Istória harii sidade Dili
Sidade Dili hahú harii iha 10 outubru 1769 no sai hanesan kapitál Timor-portugés. Iha tinan ne’e duni, sidade ne’e iha uma lubun de’it ne’ebé harii ho uma-tali no hetan protesaun hosi trinxeira no baluarte sira. Liu tiha tinan 44, hafoin hahú konstrusaun sidade Díli iha tinan 1813, abitante hela iha Díli ne’e ema-na’in 1769.
Iha 1852, ema ne’ebé horik iha Díli hamutuk 3017 no iha tinan 1879 ema-ne’ebé hela iha sidade Dili hamutuk 4.114. Iha Governador José Maria Marques nia ukun, nia haruka halo Díli sai sidade, ne’ebé iha fulan janeiru tinan 1864 sa’e ba kategória hanesan sidade. Maibé, foin iha tinan 1940 mak Díli sai nu’udar Kosellu.
Entaun, entre 1881 no 1888, hahú hadi’a estrada hirak ne’ebé liga sidade Díli ho fatin hirak ne’ebé besik Díli, no hahú loke mós rede abastesimentu bee nian ida no harii Faról hodi leno fatin ba ró sira atu tama-sai Dili.
Nune’e, ho ida-ne’e, katedrál no edifísiu Kámara Munisipál Díli harii iha hahú sékulu XX. Tanba ne’e, iha janeiru 1942, tropa australianu sira tuun ho ró iha Díli no sira hato’o razaun katak illa Timór ne’e importante ba defende Austrália, karik forsa Japaun nian sira ataka Austrália.
Entaun, iha fulan ida tuir mai, Japaun tama iha Timór no hela iha Timór to’o setembru 1945. Durante períodu ida-ne’e, Díli hetan bombardeamentu hamutuk 94 hosi aviaun Austrália nian sira.
Bainhira segunda guerra mundiál ramata, maka Portugál fila mai ukun fali Timor. Iha tempu ne’e, tenke harii hikas fali sidade Dili, tanba hetan destruisaun hafoin segunda guerra mundiál no bele adapta aan ba dezáfiu hirak foun ne’ebé atu mosu daudaun.
Rejistu sira hatudu katak, entre 1959 to’o 1963, liuhosi komandu governador Filipe José Freire Temudo Barata, harí pontikais Díli, nune’e mós loke fila-fali bee dalan ba bee foer sira no hatama bee hemu no eletrisidade, no iha tempu ne’ebá harii mós eskola sira, hospitál sira loke no hadi’a mós estrada foun sira.
Iha 1965, ema hela iha Sidade Díli neé hamutuk na’in-10.338. Entaun, Governadór seluk tuirmai, ne’ebé kaer ukun to’o 1967, jenerál José Alberty Correia, nahe alkatraun ba estrada hirak prinsipál iha Díli, hanaruk tan eletrisidade hodi lakan ba horas 24 nia laran, aprova mós Lei hirak kona-ba kondisaun estétiku, relasiona ho ijiene no konfortu bainhira ema atu harii uma ida.
Entre 1968 no 1972, bainhira jenerál José Nogueira Valente Pires mak ka’er ukun, Kámara Munisipál harii bairru sosiál sira-ne’ebé atu fahe ba populasaun hirak kbiit-laek sira.
Iha 1972, Díli hetok aumenta tan ema-ne’ebé mai horik iha sidade. Tanba, tuir rejistu, ema hamutuk na’in-17.000 (rihun sanulu resin hitu) ma hela iha Dili iha 1972 no ema besik na’in-40.000 mak hela iha Dili molok atu Timor Proklama ninia ukun rasik aan iha loron 28 fulan-novembru tinan 1975.
Hosi sidade Dili nia istória, ne’ebé hahú iha 1965 ne’e ema-ne’ebé hela iha Sidade Díli ne’e hamutuk na’in-10.338, to’o agora bazea ba sensu populasaun 22 ne’e iha populasaun totál hamutuk 324.269 mak hela iha Dili, ne’ebé kompostu hosi feto hamutuk 160.291 no mane hamutuk 163.978.
Jornalista : Jesuína Xavier
Editór : Cancio Ximenes
