MAKLN submete ona akta validasaun veteranu rejistadu 2009 ba munisípiu hodi públika
DILI, 01 agostu 2024 (TATOLI)–Ministériu Asuntu Kombatente Libertasaaun Nasionál (MAKLN) submete ona akta validasaun veteranu rejistadu iha tinan 2009 ba munisípiu sira, nune’e responsável sira bele asina hodi bele públika.
“Agora to’o ona faze ami haruka ba munisípiu atu responsável sira uluk halo parte iha ekipa validasaun ne’e bele asina akta nune’e iha fulan-janeiru mak foin ami públika lista editál. Akta ne’e haruka tiha ona ba kada munisípiu no pagamentu subsídiu sei akontese iha tinan 2025,” Sekretáriu Estadu Veteranu, Cesar dos Santos da Silva ‘Merak’, informa ba Agência Tatoli, iha ninia knaar fatin, Caicoli, kinta ne’e.
Husi totál veteranu 124.782 ne’e iha 33.000 mak seidauk valida tanba na’in la mosu iha momentu prosesu validasaun la’o.
“Ami sei la taka sai naran hirak ne’e tanba ami mós hein kleur no liu ona prazu mós ami sei aguenta hodi hein to’o loron-lima to’o neen maibé na’in la mosu,” nia akresenta.
Notísia relevante : MAKLN seidauk fó sai lista validasaun veteranu rejistradu 2009
Ekipa responsável rejista kombatente rejistadu iha tinan 2009 iha outubru 2019 no konklui iha 28 dezembru 2023.
Nune’e, MAKLN iha planu tau orsamentu iha tinan 2024 maibé la konsege realiza tanba Tribunál la aseita no dehan ninia prosesu sei la’o hela, tanba ne’e bazeia ba Governu nia polítika no planu sei prevee orsamentu ba tinan oin.
Iha Estatutu Kombatente Libertasaun Nasionál, lei númeru 3/2006 iha artigu 13 ne’e hateten kona-ba rejistu kualidade husi Kombatente Libertasaun Nasionál sei kontinua hala’o validasaun rejistu ba períodu daruak nian ba rekoñesimentu Kombatente hanesan Libertasaun Nasionál neʼebé rejista iha tinan 2009.
Iha biban ne’e, governante ne’e relata MAKLN nia ezekusaun Orsamentu Jerál Estadu (OJE) 2024 atinje ona 54%.
“Husi 54% ne’e ba halo tratamentu saúde veteranu nian, selu bolseiru veteranu nia oan, trata mós ba veteranu pendente rejistadu 2003 ho 2005 nian inklui ba tinan 2009 nian,” nia informa.
Jornalista : Osória Marques
Editora : Julia Chatarina
