DILI, 01 agostu 2024 (TATOLI)–Ministériu Komérsiu Indústria (MKI), kinta ne’e, entrega ona dokumentu konstrusaun merkadu modernu foun iha munisípiu Baucau, Lautém no Ermera ba Ministériu Planeamentu no Investimentu Estratejiku (MPIE) hodi hakat ba faze konkursu públiku.
Dokumentu ne’e entrega direita husi Vise-Ministru Komérsiu no Indústria, Augusto Junior Trindade akompaña husi Diretór Nasionál Internu, Gabriel de Jesus da Costa ho ekipa ba Ministru Planeamentu no Investimentu Estratéjiku, Gastão de Sousa, hodi kontinua prosesu preparasaun ba konkursu públiku konstrusaun merkadu modernu foun iha tinan ne’e.
“Dokumentu merkadu modernu foun tolu ne’ebé ohin ita entrega mak hanesan hahú husi estudu viabilidade to’o dezeñu Bill of Quantity (BoQ) ne’ebé preparadu ona. Ita entrega ba MPIE hodi haree halo preparasaun ba konkursu públiku tanba projetu ne’e tama ba iha grande projetu,” Augusto Junior Trindade, hatetete, liuhusi nota ne’ebê Agência Tatoli asesu, kinta ne’e.
Notisia relevante : MCI konstrui, tinan-ne’e, merkadu foun Lautém, Baucau no Ermera
Nune’e, parte rua ne’e sei haree hamutuk planu ne’e no konkursu públiku sei loke iha fulan ne’e hodi hahú obra iha tinan ne’e.
Orsamentu liuhusi grande projetu ne’ebé Governu prevee ba konstrusaun merkadu munisipál tolu ne’e, ba Lautém millaun $13, Baucau millaun $12 no Ermera millaun $11.
Vantajen husi merkadu modernu foun ba munisípiu tolu ne’e mak sei atu akomoda hotu vendedór sira iha kada munisípiu hodi fasilita sira halo negósiu ho di’ak no ekonomia mós bele la’o ho di’ak.
Jornalista : Arminda Fonseca
Editora : Julia Chatarina
