DILI, 01 agostu 2024 (TATOLI)—Empreza Pelican Paradise komprometidu sei finaliza kontrusaun show unit gallery iha tinan ne’e.
“Daudaun konstrusaun show unit gallery ba faze dahuluk projetu Pelican Paradise nian la’o ho di’ak, progresu hatudu rezultadu pozitivu no daudaun ne’e ita monta ona ar-kondisionadu (AC), elevadór, enkuantu obra elétrika ita hahú atu konklui ona, ita-nia alvu maka tinan ne’e sei finaliza,” Diretór Ezekutivu Pelican Paradise, Jeremiah Chan, informa ba Agência Tatoli, fatin konstrusaun show unit gallery, iha Tibar, kinta ne’e.
Maski nune’e, ekipa responsável sira halo esforsu ba projetu Pelican Paradise husi faze inísiu ne’e harii unidade ne’e dezde lansa fatuk dahuluk iha novembru 2022.
Notísia relevante : Governu seidauk kompleta fornese bee-moos no eletrisidade ba Pelican Paradise
Iha fatin hanesan, Jerente projetu Pelican Paradise, Osvaldo Boavida, esplika, show unit ne’e rasik nu’udar komponente pilotu ba apartamentu no restaurante sira hodi depois fó apoiu ba kontratór sira hodi haree diretamente edifísiu oinsá mak sei harii iha futuru.
“Ida-ne’e atu apoiu ba kontratór sira iha futuru atu haree materiál no finishing saida de’it mak sei uza iha unidade apartamentu sira no ida seluk mak restaurante, ida-ne’e mós hanesan modelu ida ba kualidade dapur, fasilidade no serbisu iha laran, tanba hanesan ita hatene kualidade husi otél fitun lima iha kategoria a’as tebes no demanda mós boot,” nia akresenta.
Unidade ne’e nia espetákulu hanesan uma modelu ida, bainhira pilotu ida-ne’e hotu ona bele implementa ho di’ak depois iha otél, apartamentu no restaurante sira.
To’o agora materiál hotu ba finishing nian haruka diretamente husi merkadu rai-li’ur hanesan Indonézia, Singapura, Austrália no Xina tanba Pelican Paradise hakarak fó fasilidade ho kualidade.
“Hanesan ita hotu hatene, materiál finishing nian iha Timor-Leste rasik laiha, entaun ita tenke hatama husi nasaun li’ur mak mai. Ita iha kontratór husi PT. Bhakti Timor Karya (BTK) Timor-Leste ne’ebé mai ajuda iha ne’e,” nia esplika.
Pelican Paradise mós instala ona sistema retensaun rai nian, hanesan harii morru retensaun ida ne’e hodi kaer metin rai ne’ebé namlele, prevene rai ne’ebé nakfera labele monu nune’e mós kuda ai-horis ne’ebé iha kualidade atu prevene rai monu.
Konstrusaun show unit gallery hanesan etapa inisiál husi projetu ida ho valór liu millaun $200 ne’ebé sei dezenvolve komplesu turizmu integradu ida, iha área ho totál ektare 556,63-resin, ne’ebé lokaliza entre Tasi-tolu no Tibar, ne’ebé sei inklui otél ida, kampu golfe, rezidénsia, sentru dezenvolvimentu juventude, eskola internasionál, ospitál internasionál no sentru komersiál tolu.
Jornalista : Arminda Fonseca
Editora : Julia Chatarina
