DILI, 01 Agostu 2024 (TATOLI) – Polísia Nasionál Timor-Leste (PNTL), liuhusi Unidade Polísia Vulneravel (VPU, sigla inglés) hamutuk ho ekipa Forensik ke’e sai mate isin, bebé ida, iha semitériu privadu, iha bairru Ai-Bubur Laran, iha aldeia Suhurama, suku Lahane Orientál, postu administrativu Na’in-Feto, munisípiu Dili, tuir mandadu husi Ministériu Públiku atu halo autópsia iha Ospitál Nasionál Guido Valadares.
Komandante PNTL Dili, Superintendente Xefe Polísia Orlando Gomes, haktuir katak bebé nia inan ho insiál ASCB no família sira hakoi matebian subar iha semitériu iha Lahane Orientál ne’ebé la ho dignu.
“Bainhira prosesu outópsia ba mate isin bebé ne’e remata ona, parte polísia no ekipa Forensik sei intrega hikas mate isin ba família sira hodi haloot fali no prosesu kona-ba kazu referidu kontinua submete ba Ministériu Públiku hodi la’o tuir dalan justisa”, Komandante ne’e hateten iha Caicoli, ohin.
Orlando Gomes salienta katak informasaun sira relasiona ho kazu bebé mate ne’e, parte polísia rekolla hotu ona dadus sira husi suspeitu no sasin sira ne’ebé haree akontesimentu hakoi bebé ne’e hodi reforsa prosesu julgamentu iha Tribunál. “Tanba kazu sira hanesan ne’e konsidera krime, ne’e tenke prosesa tuir lei”, nia afirma.
Aleinde ne’e, xefe aldeia Suhurama, suku Lahane Orientál, Júlio Amaral, relata katak família bebé nian husi aldeia Sarin, suku Lahane Orentál, bá hakoi mate isin iha loron 21 Jullu iha semitériu iha aldeia Suhurama ne’e.
Xefe aldeia ne’e konta katak nia simu informasaun husi komunidade katak ema na’in-tolu, mane rua no feto ida, mak lori mate isin bebé ne’e hodi bá hakoi iha rate iha tuku 16:00. Sira lori bebé nia mate isin ne’e tau de’it iha kaixa laran mak hakoi.
“Molok sira atu hakoi mate isin bebé ne’e, sira tau dook tiha husi rate, depois ema na’in-tolu ne’e tun uluk mai rate hodi ke’e tiha rai ku’ak hotu maka sira foin bá foti mate isin bebé ne’e hodi mai hakoi”, nia dehan.
Autoridade ne’e hatutan bainhira hakoi tiha sira fila ona, liu tiha loron tolu maka komunidade sira haree iha mana ida mak bá vizita rate bebé nian, maibé nia uza máskra metin. Haree tiha ida ne’e populasaun sira informa ba membru polísia ida ne’ebé hela iha aldeia Suhurama hodi halo kedan intervensaun ba mana ne’e.
“Husi informasaun ne’ebé komunidade sira relata katak mana ne’ebé mai vizita rate bebé nian ne’e maka inan ba anju oan ne’e ho inisiál ASCB. Rona tiha deklarasaun husi suspeitu, membru polísia ne’e kontaktu kedan ba Polísia Eskuadra Na’in-Feto hodi lori kedan suspeitu ASCB ba presta deklarasaun”, salienta.
Iha 25 Jullu, VPU sira bá rekolla dadus kona-ba kazu ne’e depois prepara relatóriu ba Ministériu Públiku no iha loron 01 Agostu ekipa Forensik no VPU simu orden husi Ministériu Públiku hodi ke’e mate isin bebé ne’e atu halo outópsia.
Júlio Amaral kondena hahalok ne’ebé komete husi ASCB tanba la hatudu nia responsabilidade hanesan inan, tanba la trata nia oan nia isin mate ho dignu. “Loloos, molok atu hakoi tau netik iha kaixaun simples ida mós laiha buat ida, maibé tau de’it iha kaixa laran ne’e maka la tama iha regra atu hakoi mate ida”, nia lamenta.
Jornalista: Tomé Amado
Editora: Maria Auxiliadora
