DILI, 01 Agostu 2024 (TATOLI) – Polísia Nasionál Timor-Leste (PNTL), liuhusi Departamentu Tránzitu no Seguransa Rodoviária Nasionál rejista motorizada hamutuk 4.647 ne’ebé hatama liu husi fronteira mak laiha dokumentu legál, tanba ne’e apela ba komunidade sira ne’ebé uza motór laiha dokumentu labele halo sirkulasaun hodi kontra lei kódigu estrada.
Komandante Tránzitu Rodoviária Nasionál, Superintendente Asistente Polísia, Luís da Costa, informa katak Ministru Transporte no Komunikasaun, Miguel Manetelo, husu ona ba Tránzitu hodi loke prosesu rejistu ba motorizada sira ne’ebé tama husi fronteira sein dokumentu, nune’e bele halo identifikasaun hodi Governu foti desizaun ruma.
“Ami hala’o ona ami-nia knaar bazeia ba orientasaun ministru nian hodi loke ona prosesu rejistu primeira faze ba motór sira ne’ebé tama husi odamatan tolu fronteira terrestre Timor-Leste nian. Ami rejista ona motór hamutuk 4.647 mak laiha dokumentu”, komandante ne’e hateten iha Caicoli, ohin.
Parte polísia relata ona dadus kona-ba motorizada sira ne’e ba Ministru Transporte no nia husu atu loke tan rejistu faze daruak nian, tanba motór barak ne’ebé hatama liu husi fronteira barak mak laiha dokumentu.
Tanba ne’e, polísia apela ona ba populasaun iha territóriu katak hahú loron 05 to’o 16 Agostu sei loke rejistu faze daruak ba motór ilegál sira ne’ebé laiha dokumentu. Fatin rejistu sei halo iha Unidade Polísia Tránzitu iha territóriu.
“Ha’u husu ba komunidade ne’ebé nia motór seidauk hetan dokumentu legál, bele mai rejistu iha seksaun tránzitu iha kada munisípiu, depois rejista sira bele lori filafali sira-nia motór, maibé motór sira ne’e lori bá to’o uma hakmatek iha nia fatin”, nia afirma.
Kritériu atu rejista motór laiha dokumentu maka tenke iha livru mean (buku merah), tanba ida ne’e maka kritériu ne’ebé presiza atu hetan identifikasaun. Polítika ida ne’e Governu halo atu redús sirkulasaun motór ilegál iha territóriu, tanba dalabarak mosu dezastre motór xoke malu no xoke karreta.
Ho problema ne’e maka iha mandatu Governu ne’e halo esforsu hodi hadi’a tiha sistema balun ne’ebé la’o ladi’ak, liuliu buka atu organiza tiha atividade ilegál iha fronteira sira atu bá oin labele iha tan motór ilegál mak tama tan Timór.
Notísia relevante: Motorizada ilegál 1.919 iha Oé-Cusse hahú rejista atu hetan dokumentu
Jornalista: Tomé Amado
Editora: Maria Auxiliadora
