OÉ-CUSSE, 07 maiu 2024 (TATOLI) – Ekipa konjunta komposta husi Polísia Nasionál Timor-Leste (PNTL) liuhusi Seksaun Tránzitu Rodaviáriu, Diresaun Rejionál Transporte Terrestre (DRTT) no Autoridade Aduaneiru (AA)-Alfándega, tersa ne’e, abertura rejistrasaun ba motor ilegál 1.919 iha Rejiaun Administrativa Espesiál Oé-Cusse Ambeno (RAEOA), atubele hetan dokumentu transporte.
Prosesu rejistrasaun ne’e, abertura direita husi Prezidente Autoridade RAEOA Interinu, André La’o, hodi husu motorizada na’in-sira hotu iha Oé-Cusse, presiza orgullu tanba Governu kria polítika ida oinsá bele legaliza transporte sira-ne’ebé seidauk iha dokumentu.
“Rejistu motorizada ohin ne’e, atu legaliza signifika katak, liuhusi prosesu ne’ebé seidauk legál, ohin loron ba oin tenke legaliza tuir lei, entaun liafuan sira-ne’ebé komandu aplika ne’e fó sentidu polítika ba ita hotu, atu evita liafuan jalan tikus, hatama sasán ilegál, ita hatene hela ita-nia fronteira sira iha Oé-Cusse, maibé ita tenke kumpre regra nasaun nian,” André La’o, ko’alia iha kuartél PNTL Oé-Cusse.
Notísia relevante: Polísia Tránzitu no DNTT konkorda rezolve motor ilegál
Komandante PNTL Oé-Cusse, Superintendente Polísia, Nicolau Francelino da Costa, fó sai motorizada 1.919 durante ne’e sirkula iha Oé-Cusse maibé laiha dokumentu.
Tan ne’e, mekanizmu komandu PNTL liuhusi seksaun tránzitu rodaviáriu hala’o identifikasaun hodi rekolla kada suku, atu prepara ba prosesu rejistrasaun asesu ba dokumentu.
“Motorizada 1.919 mak sei tama iha rejistrasaun, tan ne’e maka komandu PNTL Oé-Cusse, la’os mesak de’it mak hala’o serbisu ida-ne’e, maibé sei serbisu hamutuk ho DRTT no Alfándega, ekipa konjunta mak ne’e, komandu PNTL liuhusi seksaun tránzitu rodaviáriu atu ajusta de’it no akompaña ba prosesu rejistrasaun komesa daudaun ona, prosesu rejistrasaun ne’e la’o ho koordenasaun, DRTT mak halo prosesu rejistrasaun no halo pagamentu direitamente iha Álfandega,” nia afirma.
Komandante PNTL ne’e, fó hanoin ba Oé-Cusse oan sira, atu hapara ona prátika laiha dokumentu tantu motorizada no karreta, maibé hahú ohin ba oin tenke rejista atu hetan dokumentu legál, no orsamentu rejistrasaun sei tama iha kofre Estadu, atu uza ba dezenvolvimentu nasaun nian.
Agostinho Neti, nu’udar motorizada na’in, husi suku Abani sub-rejiaun Pássabe, sente orgullu no agradese ba polítika Governu bele fasilita atu hetan dokumentu motorizada nian.
“Ami agradese ba polítika Governu, ba programa ida-ne’e ami sente orgullu tanba tinan barak ona, ami halai subar de’it no hafuhu malu de’it ho PNTL atu kaer ami tanba motorizada sira-ne’e ilegál, laiha dokumentu, maibé ohin ita agradese tanba bele hetan netik motores sira-nia dokumentu,” nia orgullu.
Notísia relevante:DNTT sei halo inskrisaun ba motorizada ne’ebé seidauk iha dokumentu
Entretantu, taxa ba prosesu rejistrasaun ne’e iha DRTT hamutuk $64, hodi asesu dokumentu sira kompletu, no sei kontinua tán ba iha Alfandega ho tipu taxa la hanesan.
Purtantu, bazea dadus husi PNTL rejista, iha sub-rejiaun Pante Makasar rejista motorizada hamutuk 1.024 mai husi suku ualu, suku Bobokase 73, Costa 54, Lalisuk 107, Lifau 67, Naimeko 91, Nípani 66, no suku Taiboko 104.
Iha sub-rejiaun Oésilo rejista Motorola 387 mai husi suku tolu, Bobometo 242, Usitaqueno 63 no suku Usitasa’e 82, iha sub-rejiaun Pássabe 161 husi suku Abani 133 no suku Malelat 28.
Iha sub-rejiaun Nítibe rejista motorizada hamutuk 346, mai husi suku lima, Ban-Afi 51, Bene-Ufe 49, Lela-Ufe 116, Suni-Ufe 63 no suku Usitako 67.
Notísia relevante: PNTL sei investiga sidadaun hatama motór-karreta ilegál hosi Indonézia
Jornalista: Abílio Elo Nini
Editór: Evaristo Soares Martins
