iklan

NASIONÁL, HEADLINE, SEGURANSA

Polísia Tránzitu no DNTT konkorda rezolve motor ilegál

Polísia Tránzitu no DNTT konkorda rezolve motor ilegál

Xefe Departamentu Tránzitu no Seguransa Rodoviáriu, Superintendente Asistente Polísia, Luís da Costa. Imajen Tatoli/Abílio Elo Nini.

DILI, 12 marsu 2024 (TATOLI)– Polísia Nasionál Timor-Leste, Departamentu Tránzitu Rodoviaria Nasionál no Diresaun Nasionál Transporte Terrestre (DNTT) iha ona konkordánsia hodi solusiona motor ilegál sira ne’ebé durante ne’e sirkula iha territóriu nasionál, maka tenke legaliza.

Komandante Tránzitu Rodoviária Nasionál, Superintendente Luis Soares, hateten, liuhosi reuniaun liña ministeriál foti kestaun ligadu ho motorizada ilegál ne’ebé sirkula hela iha territóriu tanba Polísia Tránzitu maka bele inpoin no implementa regra liu-liu transporte ne’ebé sirkula iha públiku.

“Ami-nia observasaun iha munisípiu barak maka motor ilegál sei sirkula ba-mai, kuandu polísia prende ona maka sei lafó fali. Ami simu informasaun hosi munisípiu liu-liu iha Oé-cusse motor ilegál kuaze rihun rua, Covalima mós hanesan, ne’ebé munisípiu rua ne’e motor ilegál rihun tolu-resin. Ami nia sujestaun ne’e parte DNTT rasik aseita ona, no sira haruka Polísia Tránzitu atu bele rekolla motor ilegál sira ne’ebé mak sirkula iha territóriu ne’e. Momentu ne’ebá orienta ona ba eskuadra sira no dadus tama dadauk ona”, Komandante Tránzitu Rodoviária Nasionál, Superintendente Luis da Costa,informa ba Agência Tatoli, iha nia knaar fatin Kuartel Jerál PNTL Caicoli, tersa ne’e.

Oinsá atu legaliza, Komandante Tránzitu dehan, Autoridade Aduaneira ka Alfándega hateten katak motor ne’ebé latama hosi odamatan laiha dalan atu legaliza ka selu taxa, no DNTT fali mós hanesan molok motor sira ne’e hetan dokumentu tenke selu taxa.

“Rua ne’e problema hotu. Oinsá atu solusiona problema ne’e maka tenke rejistu motor ilegál sira ne’e, depois kanaliza ba Polísia Tránzitu no akumula dadus hotu haruka ba Ministru Transporte no Komunikasaun hodi lori ba Konsellu Ministru.  Bainhira Konsellu Ministru deside ona maka instituisaun relevante hanesan Alfándega tanba sira hein bainhira iha ona despasu sira prontu ezekuta”, nia esplika.

Rejistu ba motor ilegál sira ne’e mak agora sirkula hela ne’e, enkuantu motor sira foin hatama labele rejista ona tanba loron rejista iha fevereiru 2024 (durante fulan-ida). Dadaun Komandu munisipál rejista ona motor ilegál sira no Departamentu Tránzitu Nasionál sei kumpila hamutuk dadus sira ne’e hodi haruka ba parte relevante.

“Hakarak legaliza tiha tanba problema motor ilegál ne’e lahotu de’it dezde Timór ukun aan to’o de’it agora. Ne’ebé, kuandu la legaliza tiha sira ne’ebé iha maka problema ne’e kontinua ba beibeik”, membru PNTL ho deviza ai-funan rua ne’e preokupa.

Razaun hakarak legaliza tanba haree hosi aspetu oioin hanesan aspetu ekonomia no sosiál.

“Purezemplu kuandu polísia prende konserteza la fó fali tanba motor ilegál, prende tiha ninia prosesu kontinuasaun ba Patrimóniu Estadu hodi halo leilaun, regra mak hanesan ne’e. Razaun seluk maka inan-aman lakon osan sosa depois halo sirkulasaun hanesan ema ba na’ok sasán, hafuhu malu de’it entaun impede sira-nia atividade”, nia subliña.

Tanba ne’e maka situasaun ne’e labele eziste bebeik entaun tenke solusiona, tanba ne’e maka parte hothotu tau hanoin hamutuk hodi rezolve tanba haree ba ninia implikasaun ne’e ba fatór ekonomia no sosiál.

Komandante Tránzitu ne’e relata katak, durante aprensaun ba motor ilegál sira ne’e maioria utiliza hosi servidór Estadu hanesan membru FALINTIL-Forsa Defeza Timor-Leste (F-FDTL).

“Rejistu iha Baucau ne’e domina hosi sira (F-FDTL), entaun ami halo auto stop ami latolera servidór Estadu utiliza motor ilegál, tanba realidade iha loron hirak liubá oknum F-FDTL ida nia primu lori motor laiha dokumentu depois ami prende, depois telefone ba nia mai ha’u rasik mak husu nia karta kondusaun nia hatudu fali kartaun militár, ha’u dehan ha’u lahusu kartaun servisu más karta kondusaun, nia ko’alia barak maibé motor ami nafatin prende”, nia haktuir.

Tuir responsável Tránzitu Rodoviáriu ne’e katak, maioria membru F-FDTL sira seidauk iha karta kondusaun tanba iha pasa revista mak hetan, sira hatudu de’it kartaun servisu nian.

Tanba ne’e maka nia iha hanoin hodi koordena ho superiór F-FDTL oinsá maka membru F-FDTL ne’ebé seidauk iha karta kondusaun Polísia Tránzitu bele ba fó formasaun, depois rekomenda ba DNTT hodi atribui karta kondusaun ba sira.

“Forsa no Polísia tenke sai ezemplu ba públiku la’ós sai fali autór. Pedidu ha’u nian ne’e maske seidauk formál maibé sira aseita ona hodi ami ba fó formasaun liu-liu lei kódigu estrada, militár tenke hatene kódigu estrada”, nia akresenta.

Jornalista : Antónia Gusmão

Editór: Rafael Ximenes de A. Belo

 

iklan
iklan

Leave a Reply

iklan
error: Content is protected !!