Engarrafamentu kontinua akontese iha Dili tanba falta konxiénsia umana
DILI, 02 Agostu 2024 (TATOLI) – Engarrafamentu iha via públika iha kapitál kontinua akontese, tanba falta konxiénsia ema nian. Tanba ne’e, Komandante Departamentu Tránzitu no Seguransa Rodoviária Nasionál, Superintendente Asistente Polísia, Luís da Costa, husu ba ema hotu ne’ebé lori transporte atu kumpre Leí Kódigu Estrada hodi hamenus problema ne’e.
“Problema engarrafamentu kontinua akontese iha kapitál ne’e, tanba ema ne’ebé kondús transporte tantu roda haat komu roda rua mak seidauk iha konxiénsia”, Komandante Luís da Costa lamenta iha Caicoli, ohin.
Nia dehan Dili ne’e dezde tempu portugués, indonézia to’o ukun aan ne’e laiha mudansa ba via públika. Estrada maka nafatin hela de’it, tanba ne’e presiza kontribuisaun ema hotu nian atu komprende ho didi’ak Lei Kódigu Estrada bainhira utiliza transporte iha dalan públiku bele la’o tuir orden.
“Úniku solusaun atu rezolve engarrafamentu iha kapitál ne’e maka konxiénsia ema nian mak tenke aas”, reitera.
Tuir nia, ema hotu iha direitu atu uza estrada iha sidade ne’e tuir hakarak atu halo movimentasaun ho livre, maibé presiza hatene ho didi’ak regulamentu sira. “Karik atu para transporte iha ne’ebé, para oras hira, presiza hatene, nune’e labele hamosu engrafamentu”, salienta.
Luís da Costa realsa katak kondutór no motorista barak maka seidauk iha hanoin, bainhira karreta seluk para ona iha estrada públiku tuir liña no laiha ona fatin atu para tan, loloos karreta seluk la presiza atu para tan iha karreta seluk nia sorin hodi oukupa fali estrada públiku, maibé ida ne’e mak sempre akontese.
Polísia Tránzitu sempre nota no halo beibeik asaun hodi xave tiha karreta nia roda atu fó lisaun ema seluk, maibé ema kontinua la kumpre no halo beibeik hahalok sira hanesan.
Tanba ne’e, polísia nafatin apela ba ema hotu iha kapitál ne’ebé lori motór no karreta atu buka kolabora hamutuk ho Tránzitu hodi redús engarrafamentu iha sidade atu labele perturba movimentasaun ema seluk nian bainhira hakarak halo viazen ho lalais bá fatin ne’ebé destina bá.
Notísia relevante: Tránzitu alerta ba populasaun ne’ebé laiha dokumentu motorizada labele halo sirkulasaun
Jornalista: Tomé Amado
Editora: Maria Auxiliadora
