Kada Tinan, Fundasaun Alola rejista inan entre 300-600 fornese susu-been eskluziva
DILI, 02 agostu 2024 (TATOLI)– Kada tinan Fundasaun Alola rejista inan liu 300 to’o 600, ne’ebé fornese susu-been inan eskluzivu ba bebé foin moris, husi fulan 0-6, Diretora Ezekutiva Fundasaun Alola, Maria Imaculada Guterres, relata.
Relasiona ho Semana Mundiál Fó Susu-been Inan, 1-7 agostu, iha ne’ebé Fundasaun Alola halibur iha Munisípiu hitu, mak hanesan iha Dili, Manufahi, Lautem, Aileu, Ainaro, Liquiça no Viqueque, hodi hala’o programa fó susu-been inan eskluzivu no prevene má nutrisaun iha labarik sira.
“Tinan ida-ne’e, Fundasaun Alola seidauk halibur dadus kona-ba inan sira ne’ebé eskluzivamente fó susu-been inan. Depois Semana Mundiál Fó Susu-been Inan nian, ami sei rekolla dadus, tanba ami sei hein hela bebé balun ne’ebé sei akompaña hela, hafoin bebé sira ne’e halo fulan-neen, ami sei rekolla dadus ne’e entre fulan-agostu no setembru, maibé normalmente kada tinan ami rejista 300 to’o 600 bebé simu susu-been eskluziva, entaun inan sira ne’ebé fornese susu-been ne’e ba inan eskluzivu iha área sira ne’ebé ami hala’o programa ne’e,” Diretora Maria Guterres ba TATOLI, iha Gabinete Fundasaun Alola Mascarenhas Dili, sesta ne’e.
Ho selebrasaun ida-ne’e, Fundasaun Alola hala’o kompetisaun, konkursu Health baby, te’in hahan ba bebé husi fulan-neen to’o tinan tolu, nutrisaun ba inan sira, no informasaun hodi apoia inan sira ne’ebé fó susu.
“Iha Semana Mundiál fó Susu-been Inan nian, ne’ebé sempre selebra iha mundu; hahú loron 1 to’o 07 agostu, tuir deklarasaun sira husi UNICEF no OMS, ne’ebé implementa ona programa ne’e hodi tau matan ba inan no bebé sira, tanba inan nia susu-been importante tebes ba bebé nia kreximentu,” nia esplika.
Ezekutiva ne’e esplika, iha balun ne’ebé fó susu-been inan, maibé iha klaran sira la kontinua tanba iha fatór balun ne’ebé la garante katak inan sei fó susu-been inan eskluzivu ba bebé durante fulan-neen nia laran.
“Entaun inan sira presiza apoiu atu bele fornese susu-been inan eskluzivu ba bebé ho susesu, tanba ida-ne’e la’ós fasil, iha inan balun tenke ba fali servisu, nst,” nia hateten.
To’o agora Fundasaun Alola halo ona kolaborasaun ho Ministériu Saúde, ne’ebé hetan apoiu husi parseiru dezenvolvimentu hanesan UNICEF, OMS, Child Fund Timor-Leste, Sunrise Joint Venture, no seluktan.
Notísia relevante:Governu altera rejime jurídiku substituisaun susu-been inan nian
Jornalista : Felicidade Ximenes
Editór: Rafael Ximenes de A. Belo
