BOBONARO, 02 agostu 2024 (TATOLI) — Kompania AL iha loron 31 fulan-jullu tinan 2024 ne’e deside hapara ona kontratu pesoál limpeza na’in-40 ne’ebé durante ne’e servisu iha Ospitál Referál Maliana.
Portavós Pesoál Limpeza, Crispim Perreira dos Santos, sente triste no lamenta tanba desizaun Kompañia hapara serbisu ne’e la bazea ba avaliasaun serbisu.
“Ami-nia servisu durante ne’e la’o ho di’ak, kompañia nia materiál serbisu durante ne’e laiha, ami esforsu-aan servisu tanba hakarak kompañia nia naran di’ak, maibé depois kompañia mai hapara loos ami, nunka mai enkontru halo avaliasaun derrepente mai hapara loos ami ne’e, kona-bá saida nia, ami la’ós kompañia AL ne’e mak foin serbisu, ami servisu dezde 2009 tinan 10-resin ona,” nia hateten liuhosi konferénsiaa imprensa, ne’ebé realiza iha Ospitál Referál Maliana, kinta ne’e.
Portavós ne’e akresenta, problema referida traballadór sira hato’o ona ba Sekretaria Estadu Formasaun Profisionál no Empregu (SEFOPE) Munisípiu Bobonaro no bainhira kompañia mantein ho desizaun ne’e sei hato’o tan keixa ba Provedoria Direitu Umanu no Justisa (PDHJ, sigla portugés) atu loke prosesu tuir dalan legál.
“Hapara ha’u hanesan mós hapara ha’u ho ha’u-nia feen ho oan nia vida tomak, tanba durante ne’e tinan bailoro ami hala’o de’it ami-nia kna’ar iha Ospitál Referál Maliana, ami bele para servisu, maibé laiha ema ida mak atu kontinua serbisu iha ospitál, bainhira seidauk rezolve ami-nia problema ne’e,” nia hateten.
Pesoál limpeza antigu ne’e argumenta, tuir loloos kompañia AL laiha direitu atu hapara kontratu, tanba kompañia manán konkursu públiku iha Ministériu Saúde atu halo de’it jestaun ba serbisu limpeza iha Ospitál Referál Maliana.
Nune’e Crispim rekomenda ba parte kompetente, liuliu Ministériu Saúde atu buka solusaun ba problema ne’e, tanba konsidera desizaun kompañia AL foti laiha koordenasaun ho parte ezekutivu Ospitál Referál Maliana.
“Ami mai hatudu karta ba diretór ospitál, nia dehan, ida-ne’e ha’u seidauk hatene, ami servisu la’ós Kompañia maka rekruta ami, ne’e Ospitál Referál Maliana mak rekruta ami iha 2008, Prezidente José Ramos Horta ho Ministru Nelson mai inaugura Ospitál ida- ne’e, doutor ho enfermeiru sira mai halo kna’ar iha-ne’e, haree área luan maka diretór haruka karta ba suku, maka xefe suku halo ami mai serbisu iha-ne’e,” nia hateten.
Traballadora Juleta Ramos Moniz, sente triste no konsidera desizaun ne’e la Kustu,tanba karta hapara kontratu ne’e ba de’it sira na’in-40, enkuantu na’in-10 sei kontinua servisu.
“Ami-nia haree ida-ne’e haree liu ba kór, família no organizasaun nian, tanba na’in-10 ne’e sira-nia saudara ne’e mak la hapara ne’e. Sé dehan osan mak laiha entaun hapara hotu,” nia kestiona.
Ba problema ne’e, Ajénsia Tatoli tenta halo konfirmasaun ho responsável Kompania AL liuhosi telefónika maibé númeru mate hela.
Enkuantu tuir konteúdu karta ne’ebé TATOLI asesu, kinta ne’e sita katak kompañia deside hapara traballadór hirak-ne’e tanba kestaun idade liu ona tinan 50 no balun tanba avaliasaun servisu ladi’ak.
Notísia relevante: Ospitál Maliana presiza urjente médiku
Jornalista: Sérgio da Cruz
Editór: Evaristo Soares Martins
