MALIANA, 14 setembru 2023 (TATOLI)-Diretór Ezekutivu Ospitál Referál Maliana, Bourdaloue Fernandes Moniz, husu ba Ministériu Saúde atu aumenta tan númeru médiku liuliu enfermeriu no enfermeira sira hodi aumenta kapasidade atendimentu saúde sekundaria no tersiária ba pasiente sira.
Nia konta tuir katak Governu instala ona fatin no ekipamentu foun ne’ebé hetan inaugurasaun husi Antigu Ministra Saúde, Odete Maria Freitas Belo, iha tinan kotuk, maibé to’o oras ne’e seidauk utiliza tanba menus rekursu umanu.
Notísia Relevante:PN husu MS rezolve problema rua iha Hospital Referál Maliana
Ospitál Referál Maliana iha ona planu atu hasa’e ninia atendementu Beat Ocupation Rate (BOR) hosi kama 24 ba 105 tanba antes ne’e governu estabelese ona sala sirúrjia hamutuk kama 25, sala pediátria kama 24, sala ba pasiente tubercolusse kama 15 no Intensive Care Unit (ICU) kama 10.
“Tanba sei falta de pesoál, mediku liuliu imfermeiru, ita presiza koloka iha sala sirúrjia ne’e enfermeiru na’in 8 no sala pediatria mós na’in 8 tanba nia iha 24 kama, ami mós presiza médiku, tanba foinlalais HNGV loke vaga ami-nia médiku na’in haat mak ba agora,ema menus,” Nia hato’o problema ne’e ba Deputadu Komisaun F iha salaun Administrasaun Munisípál Bobonaro, kuarta ne’e
Iha parte seluk, nia rekomenda mós ba Governu liuhosi Ministériu Saúde atu konstrui moru protesaun iha área ospitál nia kotuk tanba daudaun ne’e kondisaun moru ne’e hahú monu ona.
“Lutu sira ne’e desde tempu Indonézia tia ona, agora ema sobu tun-sae, dalaruma ekipamentu médiku sira ita tau ladún di’ak, ita nia fásilidade di’ak ona, moru la di’ak ne’e mós problema,” nia preokupa.
Hatán ba preokupasaun ne’e, Prezidente Komisaun F trata asuntu Saúde iha Parlamentu Nasionál, Maria Gorumali Barreto, hateten sei hato’o ba governu hodi bele konsidera iha futuru.
Notísia Relevante:Vise MS inaugura sistema purifikasaun Bee LMS iha ospitál Maliana
Jornalista: Sergio da Cruz
Editór: Agapito dos Santos
