DILI, 02 agostu 2024 (TATOLI)–Ministériu Edukasaun (ME) hahú deskute hodi define kona-ba destakamentu profesór rekrutadu husi programa rekrutamentu bolsa kandidatu faze daruak, ba eskola ne’ebé presiza.
“Ministériu Edukasaun mak deskute hela kona-ba oinsá mak halo destakamentu ba sira, destaka bá eskola ida-ne’ebé presiza, entaun presiza hela tempu oituan atubele halo kolokasaun, ne’e duni fó tempu oituan ba Ministériu Edukasaun, daudaun sira halo hela sira-nia serbisu atubele define kona-ba destakamentu,” Prezidente Komisaun Funsaun Públika (KFP), Agostinho Letêncio de Deus, hateten, iha Balide, sesta ne’e.
Prosesu sira tuir mai mak hanesan serimónia tomada pose.
“Ita-nia prosesu teste bolsa kandidatu faze daruak ne’e ramata ona, ita-nia kandidatu 2.000-resin mak pasa iha rekrutamentu ne’e, maibé ba oin ne’e sei ko’alia nafatin ho Ministériu Edukasaun atu deskute hela prosesu sira tuir mai hanesan prosesu kolokasaun ba serimónia tomada pose,” nia akresenta.
Notísia relevante : Membru PN husu ME aselera prosesu vaga bolsa kandidatu faze daruak
Ho ida-ne’e, KFP mantein halo koordenasaun ne’ebé di’ak ho ME liga ba kolokasaun bolsa kandidatu profesór ba faze daruak ninia.
“Kona-ba jestaun profesór, ne’e kabe ba kompeténsia Ministériu Edukasaun, atu koloka se ita hotu akompaña karik entrevista sira-ne’ebé halo ho Ministra, ne’e katak parese bele fazeadamente maibé primeiru identifika uluk eskola ne’ebé urjente, entaun iha 2.000-resin mak pasa, maibé ida-ne’e hahú ba oin ne’e ita koloka ba kada eskola, ne’e duni prosesu sira ne’e hotu iha diskusaun nia laran,” nia akresenta.
Diretora Rekursu Umanu iha ME, Anita Tavares, informa, iha aplikante hamutuk na’in-2.442 mak halo teste bolsa kandidatu profesór ba faze daruak, husi kandidatu 6.547 ne’ebé mak partisipa teste.
“Kandidatu 2.442 ne’e kompostu husi feto 1.536 no mane 906. Kandidatu la pasa iha teste bolsa kandidatu hamutuk 4.105 kompostu husi feto 2474 no mane 1.631,” Diretora Anita, hateten iha salaun ME, Vila-Verde, kinta ne’e.
Totál kandidatu ne’ebé tama iha kritériu teste bolsa kandidatu ne’e hamutuk 7.565, ne’ebé kompostu husi feto 4.575 no mane 2.990, maibé ikus mai kandidatu 6.547 kompostu husi feto 4.010 no mane 2.537 mak partisipa iha teste.
“Entaun sira ne’ebé la marka prezensa iha teste bolsa kandidatu ne’e hamutuk 1.018,” nia akresenta.
Jornalista : Osória Marques
Editora : Julia Chatarina