DILI, 01 jullu 2024 (TATOLI)—Membru Parlamentu Nasionál (PN) liuhusi Deputadu CNRT, Marcos Soares Martins, husu Ministériu Edukasaun (ME) atu aselera prosesu vaga rekrutamentu bolsa kandidatu faze daruak, nune’e bele responde ba eskola balun ne’ebé menus profesór iha territóriu.
Notísia Relevante: Aplikante 7.468 vaga bolsa kandidatu faze daruak tuir ezame iha 28 juñu
“Husu Governu atu bele kontinua haree problema edukasaun ne’ebé daUdaun Ministériu Edukasaun hala’o hela. Etapa ba etapa sei fó solusaun rezolve problema menus profesór. Apresia mós ba ministra, tanba kontinua teste bolsa kandidatu faze daruak, husu ida-ne’e bele aselera. Labele to’o de’it iha bolsa faze daruak maibé se bele prepara faze datoluk nian,” nia hateten liuhusi reuniaun plenária PN, segunda ne’e.
Deputada CNRT, Aliança Maria Gorubelo, apresia Ministra Edukasaun nia responde rezolusaun Parlamentu nian ho matenek no dignu, tanba daudaun halo teste ba bolsa kandidatu faze daruak prosesu la’o hela, hahú ona iha 27 Juñu tinan ne’e no iha 7.550 mak tama hela konkorénsia hodi prienxe vaga ne’ebé iha. Nune’e, fiar katak sei responde falta profesór ne’ebé hasoru iha territóriu.
Deputada FRETILIN, Sancia Florencia Paixão Bano, husu ME atu atu aplika ona rezolusaun ne’ebé PN aprova, atu nune’e solusiona lalais problema profesór kontratadu sira atu nune’e profesór kontratadu sira hanorin hikas iha estudante sira.
“Tanba, problema falta profesór iha eskola balun difikulta tebes prosesu ensinu,” nia dehan.
Vise Ministru ba asuntu Parlamentár, Adérito Hugo da Costa, hatete Ministériu Edukasaun loke bolsa kandidatu faze dahuluk ramata hodi aloka ona profesór sira ba eskola sira iha territóriu.
Agora, faze daruak kontinua loké bolsa kandidatu profesór sira hodi kompleta profesór sira iha eskola balun ne’ebé menus.
Tuir planu, sei loké nafatin vaga bolsa kandidatu ba faze datoluk hodi prienxe menus profesór no garante kualidade edukasaun iha Timor-Leste.
Notísia Relevante: KM autoriza loke teste bolsa kandidatu faze daruak
Jornalista : Nelson de Sousa
Editór : Cancio Ximenes
