DILI, 02 jullu 2024 (TATOLI)—Membru Parlamentu Nasionál (PN) liuhusi Deputadu KHUNTO, António Verdiál de Sousa, husu Governu liuhusi Ministériu Juventude, Desportu, Arte no Kultura (MJDAK), atu halo preparasaun másimu ba eventu jogu Komunidade Nasaun Ko’alia Lian Portugés (CPLP, siglá portugés) ne’ebé Timor-Leste sei sai uma-na’in iha tinan oin.
Notísia Relevante: KM diskute preparativu jogu CPLP XII 2025
“Hanesan Deputadu, hakarak duni realiza eventu ne’e iha Timor-Leste, mak Governu tenke hatudu nia kapasidade hodi prepara kondisaun di’ak,” nia hateten ba Agência TATOLI iha resintu Parlamentu Nasionál.
Governu presiza kria kondisaun másimu nu’udar nasaun hodi realiza eventu ne’e, tanba iha eventu ne’e sei iha modalidade oioin, entaun presiza haree ba kondisaun infraestrutura.
Nune’e mós, kona-ba preparativu jogadór no atleta sira husi modalidade oioin nune’e presiza promove liga futeból ho kampionatu sira hodi bele selesiona atleta no jogadór ne’ebé kualifikadu hasoru eventu ne’ebé sei mai.
Tan ne’e, nia husu, Governu presiza apoiu orsamentu másimu hodi realiza eventu ne’e no preparativu sira seluk hodi bele organiza eventu jogu CPLP ne’e ho susesu.
“Nune’e, ema seluk mai husi CPLP haree ita-nia kondisaun preparadu hodi bele realiza eventu ne’e ka lae. Bainhira kondisaun la preparadu, klaru katak ema sei la mai. Maibé, asuntu ne’e importante, ho ida ne’e, hanesan Deputadu nafatin husu Governu tau nafatin tau matan hodi kria kondisaun realiza eventu ne’e,” nia dehan.
Jogu CPLP importante tebes hodi hametin liután relasaun amizade entre nasaun amigu CPLP liuhusi desportu no parte ida mós atu promove no dezemvolve liután desportu iha Timor-Leste.
Notísia Relevante: 16 abríl, komisaun mai avalia preparasaun TL hodi sai uma-nain ba jogu CPLP 2025
Antes ne’e mós, liuhusi reuniaun plenária Parlamentu Deputadu balun balun levanta ona hodi husu Governu liuhusi ministériu kompetente atu fó atensaun ba konstrusaun kampu futeból hodi halo preparasaun ba eventu jogu CPLP ne’ebé sei mai.
Entretantu, Timor-Leste sai uma-na’in ba jogu CPLP iha 2025 deside liuhosi konferénsia Ministériu Juventude no Desportu ba-XIV CPLP, iha Luanda, husi nasaun hamutuk sia mak aprova ho unaminidade ba proposta Timor-Leste nian ne’ebé husu atu sai uma-na’in ba jogu CPLP iha 2025.
Kandidatura Timor-Leste nian hodi sai uma-na’in ne’e aprezenta direta husi Ministru Juventude, Desportu Arte no Kultura (MJDAK), Nelio Isaac Sarmento, no hetan votu unaminidade husi nasaun membru sira hanesan Angola, Brazil, Cabo Verde, Guinne-Bissau, Guinne Equatorial, Moçambique, São Tome e Principe no Portugál.
Hafoin deklara kandidatura, Diretór Nasionál Desportu MJDAK, Cesario da Silva, halo kedan aprezentasaun ba preparasaun téknika Timor-Leste nian, iha ne’ebé jogu ne’e sei iha kompetisaun ba modalidade sira mak hanesan Atletizmu, Basketból, Voleiból Praia, Tenis Kampu, Futeból, Taekwondo, Karate-do no Xadres, inklui mós Atletizmu Paralímpiku.
Jogu CPLP ne’e sei implementa iha loron 17-27 Jullu tinan 2025 ne’ebé sei kompete entre nasaun CPLP hotu.
Enkuantu, daudaun ne’e Governu Timor-Leste hahú prepara ona kondisaun liuliu otél sira iha Dili laran, kampu futeból hodi realzia jogu sira-ne’e iha Dili no munisípiu Ermera.
Notísia Relevante: Governu esforsu hadi’a fasilidade desportiva antes realiza jogu CPLP
Jornalista : Nelson de Sousa
Editór : Cancio Ximenes
