DILI, 05 agostu 2024 (TATOLI)–Empreza Daya Marketing (DELOS) apoia bebidas hanesan DELOS no Country Joice hamutuk kaixa 4000 no fahe kamizola hamutuk 1.111 ba ekipa voluntária atu bele utiliza iha serbisu atendimentu bainhira Papa Francisco hala’o vizita Estadu no pastorál iha Timor-Leste, iha 09-11 setembru 2024.
Notísia Relevante: Infografia: Vatikanu lansa ona oráriu Papa Francisco hala’o vizita pastorál iha Timor-Leste
Bebida sira-ne’e, nia dehan, hetan apoiu husi Pabrik Sosro iha Jakarta no balun husi ABC nian hanesan Kacang Hijau no biskuit kaixa 100 ba ekipa servisu voluntariu ba simu Papa Francisco surante lolron tolu iha Timor-Leste.
“Razaun fó apoiu ba ekipa voluntariu preparasaun simu Santo Padre nian, tanba ekipa preparasaun ba atividade simu amu Papa presiza iha enerjia. Husi ekipa ne’e presiza enerjia mós, entaun fó apoiu bebidas enerjia hodi bele fó enerjia hanesan bebidas no biskuit kuandu sente hamlaha no hemu bebidas sira-ne’e. Tanba ne’e mak ami ajuda ekipa voluntariu sira,” Jerente Marketing kompaña Daya Marketing (DELOS), Elia Quintão, hateten ba jornalista sira, iha Fatuhada.
Elia Quintão esplika, empreza Daya Marketing hato’o agradesimentu no fó orgullu boot tebes ba Amu Papa nia vizita mai Timor-leste, tanba ne’e mak empreza kontente no servisu nafatin ho ekipa voluntáriu sira atu nune’e bele simu Papa ho di’ak.
Jerente ne’e garante, Daya Marketing disponivel sempre hodi bele apoiu eventu saida de’it ne’ebé hala’o iha Timor-Leste ne’e, kompañia sempre prontu.
Iha fatin hanesan, Vise terseiru Koordenadór ba ekipa voluntariu, Joana Miranda, konsidera apoiu empreza Daya Mareketing ne’e importante tebes hodi bele apoiu serbisu voluntáriu sira-nian ba preparasaun simu vizita Papa nian.
“Ami la haluha hato’o agradesimentu ba iha Nai Maromak, tanba ho Nia tulun tomak liuhusi Daya Marketing bele iha laran luak fó apoiu ba ekipa voluntária. Ami sente haksolok tebes bele hetan apoiu ida-ne’e. Apoiu ida-ne’ebé mak husi fuan ho laran tomak. Ami iha ekipa 1.000-resin hanesan ne’e,” Vise terseiru Kordenadór ba ekipa voluntária ne’e hateten.
Koordenador ne’e hateten, sente ida-ne’e tulun tebes sira-nia serbisu tanba ekipa voluntária mai ho mamuk, tanba ne’e mak ekipa nakloke ba parte hotu-hotu ne’ebé mak fó apoiu no atu fó apoiu.
“Apoiu boot tebes mak husi Daya Marketing nian. Maromak fó tulun ba ita-boot sira hotu (Daya Marketing). Kamizola sira-ne’e sei utiliza husi ekipa voluntáriu iha loron tolu vizita Amu Papa nian. Ida-ne’e sei halo diferensa, tanba sarani barak mak sei uza kamizola husi Governu no igreja prepara. Voluntariu nian diferensa atu fasil tebes voluntáriu sira tulun ita-nia sarani sira-ne’ebé mak presiza iha tempu misa,” nia dehan.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Cancio Ximenes
