DILI, 05 agostu 2024 (TATOLI)–Estudante husi Universidade Orientál Timor-Lorosa’e (UNITAL) husu ba Ministériu Ensinu Superiór, Siénsia no Kultura (MESSK) atu tau atensaun ba reitór nia grau akadémiku.
“Husu ba MESSK atu tau atensaun ba asuntu magnífiku reitór UNITAL ne’ebé mak mai ho nível lisensiatura de’it hodi lidera UNITAL. Ami husu atu toma atensaun ba asuntu ida-ne’e, tanba se lisensiatura ida mak asina lisensiatura ida nia diploma ne’e atu sai oinsá, ne’e valór laiha no lori universidade ba iha ne’ebé. Nune’e, ami husu ba ministériu atubele fó mós solusaun mai iha estudante sira-nia ezijénsia ba títulu akadémiku reitór foun nian,” Portavós estudante UNITAL, Silvestre Freitas, hateten liuhusi konferénsia imprensa, iha resintu universidade, Becora, segunda ne’e.
Estudante universitáriu ne’e konsidera, MESSK mak responsável atu halo medida polítika sira iha área ensinu superiór, tanba ne’e presiza haree didi’ak asuntu ne’e.
“MESSK mak promove avaliasaun no inspesaun permanente ba estabelesimentu ensinu superiór, promove avaliasaun ba profisionál edukasaun ensinu superiór sira. Tanba ne’e, ami husu atu foti medida ruma ba ami-nia ezijénsia ne’ebé mak iha,” nia akresenta.
Notísia relevante : Estudante UNITAL la konkorda grau lisensiatura asume kargu reitór
Aleinde ne’e, estudante sira husu ba korpu fundasaun UNITAL atu hasai reitór atuál ne’ebé ho grau akadémiku lisensiatura.
“Tenke nomea ona reitór foun ho nia títulu akadémiku doutoramentu ho nia figura ne’ebé influénsia iha nível nasionál no internasionál. Husu ba korpu fundasaun atu nomea reitór ne’ebé mak independente no labele iha relasaun família ho korpu fundasaun,” Silvestre Freitas, tenik.
Iha semana hirak liubá, estudante UNITAL halo konferénsia imprensa hodi hato’o lamentasaun sira kona-ba grau akadémiku husi reitór atuál ne’ebé mai ho nível lisensiatura, nune’e husu ba prezidente fundasaun rasik atu buka solusaun liuhusi dalan diálogu hodi ezonera reitór atuál.
Ho asuntu hirak ne’e, estudante realiza diálogu bazeia ba disponibilidade prezidente fundasaun nian, ne’ebé monu iha loron 02 agostu 2024, maibé diálogu referidu la konsegue realiza tanba prezidente fundasaun rasik la aseita atu halo diálogu aberta ho estudante sira.
Tanba ne’e, estudante UNITAL konsidera prezidente fundasaun rasik laiha ona responsabilidade no seriedade atu rezolve estudante sira-nia problema.
“Piór liu tan prezidente fundasaun hasai fali despaixu ho nia kartakter zero toleránsia ba asaun hanesan konferénsia imprensa, diálogu no demostrasaun). Ho razaun hirak ne’e mak estudante UNITAL sei realiza tan diálogu aberta la’ós ona ho prezidente fundasaun maibé ho korpu fundasaun,” estudante hato’o.
Bainhira diálogu ho korpu fundasaun tuir mai mak laiha nafatin solusaun, mak normalmente estudante hotu sei mobiliza malu hodi blokeia totalmente prosesu aprendizajen iha UNITAL no sei halo asaun pasífiku hasoru fundadór sira.
Iha sorin seluk, Reitór UNITAL, Joaquim de Jesus Vaz, husu estudante atu fó tempu ba nia atu ko’alia ho fundasaun hodi haree ba asuntu ne’e.
“Nu’udar sidadaun, sira iha direitu atu halo protestu, maibé mós husu ba sira atu fó tempu semana ida mai ha’u atu haree ba asuntu ida-ne’e,” nia tenik.
Ministru Ensinu Superiór, Siénsia no Kultura, José Honório da Costa Jerónimo, konsidera ida-ne’e hanesan universidade nia problema internál.
Iha loron 19 juñu 2024, Joaquim de Jesus Vaz simu pose hanesan Reitór UNITAL ba períodu tinan-tolu, hahú 2024 to’o 2027.
Jornalista : Osória Marques
Editora : Julia Chatarina
