Estudante universitáriu konfensa seidauk sente dezenvolvimentu tanba problema lubuk seidauk rezolve
DILI, 05 agostu 2024 (TATOLI)—Estudante husi Universidade Nasionál Timor-Lorosa’e (UNTL), Francisca Ximenes, konfesa katak seidauk sente dezenvolvimentu iha Timor-Leste, maski tinan ne’e selebra ona loron konsulta populár ba dala-XXV (30/08/1999 to’o 30/08/2024), tanba ne’e nia husu ba Governu atu tau prioridade ba dezenvolvimentu.
“To’o agora ha’u seidauk sente dezenvolvimentu iha Timor-Leste tanba problema lubuk ne’ebé mak Governu seidauk rezolve hanesan bee-moos, dalan, kampu traballu laiha, ema hotu eskola ramata halai bá rai-li’ur tanba serbisu iha rai-laran laiha, kbiit laek barak, moris kiak barak, joven lubuk seidauk asesu ba eskola no problema barak ne’ebé mak iha área rurál ita la idenfika,” Estudante universitáriu informa ba Agência Tatoli, iha ninia knaar fatin, UNTL, segunda ne’e.
Nia nota, dezenvolvimentu iha setór xave sira to’o ohin loron seidauk rezolve, nune’e povu nafatin moris iha nakukun nia laran.
“Molok halo dezenvolvimentu tenke rezolve uluk lai povu nia preokupasaun kona-ba saúde no edukasaun ne’ebé ohin loron povu enfrenta hela ne’e tanba ita ukun-an no la hetan dezenvolvimentu hanesan iha rai seluk ne’e tanba buat kiik-oan sira de’it ita rezolve labele ona oinsá mak ita atu halo dezenvolvimentu,” Francisca Ximenes, akresenta.
Notísia relevante : Komemorasaun konsulta populár konsolida juventude nia espíritu nasionalizmu-patriotizmu hateke ba oin
Tanba ohin loron povu Timor-Leste tomak re-lembra tan ba loron istóriku konsulta populár hanesan loron ida-ne’ebé importante ba timoroan hotu hodi hakotu sira-nia sofrementu no terus husi okupasaun Indonézia nian besik dékada rua.
“To’o ohin loron, maluk timoroan ne’ebé lakon sira-nia família nafatin halerik no kontinua halo esforsu hodi buka tuir sira-nia família. Konsulta Populár ba dala-XXV ita presiza husu ba Estadu atubele toma atensaun ba ita-nia povu sira-ne’ebé daudaun sofre hela ba torturasaun iha momentu ne’ebá,” nia tenik.
Estudante husi UNTL, Elias da Costa, deskreve, loron 30 agostu 1999 liubá, hafoin referendu rezulta ema timoroan lubun sofre torturasaun, violasaun sekuál, muda obrigatóriu husi sira-nia hela fatin, no barak mós lakon obrigatóriamente no kontinua lakon to’o ohin loron la hatene sira-nia paradeiru.
“Ohin loron povu Timor-Leste tomak hanoin hikas ba loron istóriku ida-ne’e. Konsulta Populár ba dala-XXV hanesan loron ida-ne’ebé importante ba timoroan hotu hodi hakotu sira-nia terus husi okupasaun militár Indonézia,” nia tenik.
Jornalista : Osória Marques
Editora : Julia Chatarina
