DILI, 05 agostu 2024 (TATOLI)—Prezidente komisaun A trata asuntu Justisa no Konstituisionál iha Parlamentu Nasionál (PN), Patrocínio dos Reis Fernandes, konsidera pertinente ba rekomendasaun husi Programa Monitorizasaun Sistema Judisiál (JSMP, sigla inglés), atu órgaun lejislativa ne’e fó prioridade ba lei reparasaun ba vítima iha funu.
Notísia Relevante: JSMP husu PN inísia lei reparasaun vítima iha funu
“Opiniaun JSMP nian pertinente, konsideradu nu’udar kamada sosiál ida mós kontribui fó hanoin ba prosesu dezenvolvimentu,” Prezidente Komisaun A ne’e hateten ba jornalista sira iha resintu Parlamentu Nasionál, segunda ne’e.
Maibé, nia dehan, Estadu ho ninia polítika no programa rasik no programa ne’ebé hatene hatuur ninia programa prioridade saida mak atu bele hala’o durante mandatu.
Antes ne’e, Koodenadór Unidade Observasaun ba Parlamentu Nasionál (PN) husi Programa Monitorizasaun Sistema Judisiál (JSMP, siglá inglés), José Pereira, husu PN iha lejislatura daneen ne’e atu inísia fali diskusaun lei reparasaun vítima iha funu ba luta libertasaun nasionál.
“Uluk lei reparasaun vítima ninia ezbosu PN inísia tiha ona, antes ne’e JSMP mós halo audiénsia hodi hato’o paresér, maibé ikus mai inisiativa ne’e kaduka. Hanoin lei ne’e importante atu Parlamentu bele haree fila-fali,” nia hateten ba Agência TATOLI iha Tower, Fatuhada, foin lalais.
Durante ne’e, JSMP halo advokásia mós atu halo lei reparasaun vítima, tanba durante funu ema barak sai vítima ba funu, entaun Estadu ne’e iha dever atu bele kria meiu polítika ruma, nune’e iha ukun-aan ida-ne’e Estadu iha dever ida atu bele fó ba sira hanesan buat ida reparasaun.
“Ezemplu, ema sira vítima ne’e sira-nia oan sira iha kapasidade fó edukasaun ba sira no sira bele hetan tratamentu saúde gratuita, hanesan buat ida karik fó seguransa ba sira iha sira-nia moris iha sosiedade,” nia hateten.
Ho ida-ne’e, nia hateten, lei reparasaun vítima iha funu hodi valoriza ema-nia kontribuisaun ba Timor-Leste nia ukun rasik aan.
Antes ne’e, mós Diretór Ezekutivu Centro Nacional Chega (CNC), Hugo Maria Fernandes, husu PN iha lejislatura daneen ne’e atu tau atensaun no tau matan ba asuntu reparasaun vítima durante iha funu ba luta libertasaun nasionál.
Jornalista : Nelson de Sousa
Editór : Cancio Ximenes
