DILI, 23 jullu 2024 (TATOLI)-Koodenadór Unidade Observasaun ba Parlamentu Nasionál (PN) husi Programa Monitorizasaun Sistema Judisiál (JSMP, sigla inglés), José Pereira, husu PN iha lejislatura daneen ne’e atu inísia fali diskusaun lei reparasaun vítima iha funu ba luta libertasaun nasionál.
Notísia relevante:https://tatoli.tl/2020/09/08/hugo-fernandes-politika-reparasaun-nee-mak-sai-aliserse-politika-estadu-nian/
“Uluk lei reparasaun vítima ninia ezbosu PN inísia tiha ona, antes ne’e JSMP mós halo audénsia hodi hato’o paresér, maibé ikus mai inisiativa ne’e kaduka. Hanoin lei ne’e importante atu Parlamentu bele haree fila-fali,’’ Nia hateten ba Ajénsia TATOLI iha Tower, Fatuhada, tersa ne’e.
Durante ne’e JSMP halo advokásia mós atu halo lei reparasaun vítima, tanba durante funu ema barak sai vítima ba funu, entaun Estadu ne’e iha dever atu bele kria meiu polítika ruma, nune’e iha ukun-an ida ne’e Estadu iha dever ida atubele fó ba sira hanesan buat ida reparasaun.
“Purezemplu, ema sira vítima ne’e sira-nia oan sira iha kapasidade fó edukasaun ba sira, no sira bele hetan tratamentu saúde gratuita, hanesan buat ida karik fó seguransa ba sira iha sira-nia moris iha sosiedade,’’nia hateten
Ho ida ne’e mak, tuir JSMP, “Ita hakarak lei reparasaun vítima iha funu hodi valoriza ema nia kontribuisaun ba ita-nia ukun rasik an”.
Antes ne’e, mós Diretór Ezekutivu Centro Nacional Chega (CNC), Hugo Maria Fernandes, husu PN iha lejislatura daneen ne’e atu tau atensaun tau-matan ba asuntu reparasaun vítima durante iha funu ba luta libertasaun nasionál.
Jornalista: Nelson de Sousa
Editór: Rafael Ximenes de A. Belo
