OÉ-CUSSE, 05 Agostu 2024 (TATOLI) – Sekretáriu Rejionál ba Asuntu Saúde iha Rejiaun Administrativa Espesiál Oé-Cusse Ambeno (RAEOA), Luís de Jesus Neno, informa rekursu umanu atu koloka bá iha instalasaun servisu saúde sira iha Oé-Cusse seidauk sufisiente atu mellora atendimentu ba komunidade.
Luís Neno hateten iha Oé-Cusse iha ospitál referénsia ida, sentru saúde lima no postu saúde hamutuk 20, ne’ebé eziste iha sub-rejiaun haat no suku 18.
“Ita agora sei iha problema rekursu umanu ba médiku, parteira, enfermeiru no infermeira. Ita seidauk prienxe matadalan. Ita falta mós espesialista, tan ne’e Governu hakarak ka lakohi investe iha rekursu, liuliu espesialista”, Luís Neno dehan iha Padiae, ohin.
Notísia relevante: RAEOA loke konkursu ba pesoál saúde na’in-58
Nia salienta, durante ne’e, iha ospitál referénsia Oé-Cusse iha espesialista husi nasaun Kuba hamutuk na’in-12 mak halo tratamentu saúde ba komunidade Oé-Cusse iha tinan barak nia laran, tanba ne’e autoridade atuál mós hanoin atu prepara espesialista ba futuru hodi jere rasik fatin ne’e.
Nia informa, daudaun ne’e, iha postu saúde sira iha Oé-Cusse, iha infermeiru, médiku balun, parteira no farmasista, maibé ne’e seidauk sufisiente tuir matadalan. Tanba ne’e, iha futuru, postu saúde ida tenke iha médiku ida, parteira rua, infermeira rua, farmasista ida no laboratóriu ida.
“Ne’e atu tuir ona matadalan nasaun nian, katak ba futuru atu priénxe kritériu, postu saúde ida tenke iha pesoál sira hanesan ne’e. Dalaruma profisionál saúde sira iha postu saúde iha ema ida de’it, bainhira nia cuti fatin ne’e mamuk, tanba ne’e ita hakarak bainhira ema cuti, ema ida iha nafatin ida, nune’e ita-nia povo bainhira sofre moras ruma, bele hetan atendimentu di’ak no justu husi ita-nia pesoál saúde sir”, nia salienta.
Eis-Diretór Saúde ne’e husu ba autoridade lokál sira, inlui Ofisiál Polísia suku (OPS) atu serbisu hamutuk ho profisionál saúde sira iha baze hodi kolabora iha programa saúde nian iha postu saúde sira, nune’e ema hotu bele asesu ba instalasaun saúde sira.
Notísia relevante: Prevene kankru serviks, saúde Oé-Cusse introdús impaktu vasina HPV iha Pante Makasar
Tuir dadús, totál profisionál saúde no funsionáriu iha Servisu Saúde Oé-Cusse hamutuk 350, ne’ebé presta serbisu iha ospitál referénsia, sentru saúde no postu saúde.
Jornalista: Abílio Elo Nini
Editora: Maria Auxiliadora
