Tribunál Ekleziástika Dili anula matrimóniu 9 husi kazu 38
DILI, 05 agostu 2024 (TATOLI)– Vigáriu Judisiál Tribunál Ekleziástiku Arkedioseze Metropolitana Dili, Pe. Graciano Santos Barros, hateten husi janeiru to’o agostu ne’e, Tribunal Ekleziastika Arkedioseze Metropolitana Dili anula matrimóniu sia (9) hosi totál kazu 38 ne’ebé rekere ba tribunal, la inklui tribunál ekleziástika interdiosezanu Maliana-Baucau.
“Kazu sira-ne’ebé rejista iha tinan 2024 hamutuk 38 no hetan ona desizaun definitiva hamutuk sia,” Vigáriu Judisiál Tribunál Ekleziástiku Arkedioseze Metropolitana Dili, Pe. Graciano Santos Barros, hateten ba Agência Tatoli, iha Lecidere.
Ho nune’e, nia hateten, hela kazu 29 ne’ebé mak kontinua iha prosesu hodi bele hetan desizaun.
Nia esplika, pedidu ba nulidade kazamentu ne’e kompostu husi mane 21 no feto 18 mai husi totál kazu 38.
“Pedidu ne’e sira mai aprezenta liuhosi pedidu por escrito ne’ebé ita bolu dehan libelus iha lian Latina ne’ebé iha sentidu pedidu ba anulasaun ba sira-nia kazamentu,” nia esplika.
Rekerrente sira hetan koñesimentu husi padre pároku sira, molok sira aprezenta sira-nia pedidu anulasaun ba kazamentu.
“Sira hakerek pedidu ne’e, sira asina no iha vistu amu pároku sira-nian. Ho koñesimentu padre pároku. Iha libelus ne’e sira asina no amu pároku asina,” nia dehan.
Tuir amu vigáriu judisiál, kazál sira-ne’ebé aprezenta pedidu anulasaun ba sira-nia matrimóniu ne’e balun foin tinan ida ka rua, entaun tribunál husu atu halo akonselamentu husi amu pároku sira.
“Ami haruka fila ba sira hodi tuir prosesu rekonsialisaun, maibé to’o agora seidauk ida mak konsege husi rekerrente ba nulidade kazamentu, tanba iha ona fen no laen seluk. Kuaze tinan tolu ona rekonsiliasaun ne’e ladi’ak, nafatin ho sira nia desizaun nulidade,” nia hateten.
Tribunál Ekleziástika iha ekipa entendimentu konjuge ba kazál sira, maibé sira mai ho razaun ida-ne’ebé kauza ba iha pedidu anulasaun matrimóniu. Kaben-na’in sira defisil mai tuir akonselamentu,” nia hateten.
Notísia Relevante: Uma kreda TL lansa Tribunál Ekleziástika Interdiosezanu Maliana-Baucau
Jornalista : Jesuína Xavier
Editór : Cancio Xavier
