Top

PN hein Governu submete relatóriu ezekusaun OJE 2024 ba trimestre daruak nian

Prezidente Parlamentu Nasional, Maria Fernanda Lay. Imajen Tatoli/Francisco Sony

DILI, 06 agostu 2024 (TATOLI)–Prezidente Parlamentu Nasionál (PN), Maria Fernanda Lay, hateten PN simu ona husi Governu kona-ba livru submisaun relatóriu dezempeñu trimestre daruak maibé PN hein hela relatóriu ezekusaun Orsamentu Jerál Estadu (OJE) 2024 ba trismestre daruak (abríl to’o juñu) seidauk submete ba PN tanba sei prosesa hela.

Notísia Relevante: PN simu ona relatóriu ezekusaun OJE 2024 trimestre dahuluk husi Governu

“Livru kona-ba submisaun relatóriu dezempeñu trimestre daruak mai tiha ona maibé relatóriu ezekusaun seidauk mai. Ita espera katak, ha’u despaixa ba komisaun C (trata asuntu Finansa Públika) hodi halo analiza no paresér, bainhira livru rua ne’e kompleta ona iha Parlamentu Nasionál,” nia hato’o iha reuniaun plenária komisaun permanente, tersa ne’e.

Nune’e, nia hateten, Parlamentu Nasionál (PN) hela hein ezekutivu sira atu submete relatóróiu ezekusaun OJE 2024 ba trimestre daruak.

Enkuantu, tuir portál Transparánsia husi Ministériu Finansa (MF) ne’ebé Agência TATOLI, asesu, tersa ne’e, haktuir kona-ba ezekusaun OJE 2024 ho ninia orijin $2,237,618,655.00, kompromisu sira $134,454,955.75, obrigasaun sira $108,941,820.42, atuál $833,396,154.88, saldu $1,160,825,723.95 no ninia ezekusaun 42.1%.

Entretantu, papél PN iha ezekusaun Orsamentu Jerál Estadu (OJE) 2024 no lei Enkuadramentu Orsamentál Jerál Estadu no Jestaun Finansa Públika (LEO) estabelese PN iha ninia funsaun hanesan mós atu aprova OJE, apresia no aprova relatóriu ezekusaun OJE no realiza audisaun ho Governu kona-ba ezekusaun OJE no emite paresér kona-ba jestaun finansa públika.

Aleinde ne’e, iha rejimentu Parlamentu Nasionál artigu 171 (Aprezentasaun relatóriu) ne’ebé hateten Governu aprezenta relatóriu ezekusaun orsamentál iha tinan fiskál anteriór ba PN dentru fulan tolu depois tinan anteriór ramata.

Jornalista : Nelson de Sousa

Editór        : Cancio Ximenes  

Publisidade

Leave a Reply

Latest Post

error: Content is protected !!