DILI, 07 agostu 2024 (TATOLI)–Sekretaria Estadu Formasaun Profisionál no Empregu (SEFOPE) kuarta ne’e, realiza semináriu nasionál ho tema ‘Dezafiu Kriasaun Empregu iha Timor-Leste ‘, hodi halibur ideia sira atu hatan ba dezafiu kriasaun empregu iha Timor-Leste.
“Objetivu prinsipál ohin ita halo semináriu ne’e oinsá bele hamutuk hodi fó hanoin ba malu hodi haree dezafiu kriasaun empregu ne’ebé ita hasoru atu buka nia dalan oinsá ita bele kria kampu traballu ne’ebé di’ak ba joven sira. Tanba ita hasoru problema boot tanba rejista dezempregu 5,1% iha Timor-Leste,” Diretór Sentru Informasaun Merkadu Traballu iha SEFOPE, Geraldo Moniz, hato’o iha salaun Komisaun Nasionál Eleisaun (CNE, sigla portugés).
Nia dehan, haree ba númeru dezempregu ho nia pursentu a’as, maka SEFOPE konvida matenek na’in sira husi Kámara Komérsiu Timor-Leste (CCI-TL, siglaportugés), akademistra, inklui sentru formasaun sira atu fó hanoin hamutuk atubele hetan informasaun di’ak nune’e bele rezolve problema dezempregu iha rai-laran.
“Tuir dadus númeru dezempregu iha Timor-Leste 5,1% ne’e ita rekolla husi serbisu hamutuk ho Estatístika Timor-Leste iha tinan 2021 liubá,” nia akresenta.
Notísia relevante : Peskiza Forsa Traballu 2021 hatudu taxa dezempregu tun ba 5,1%
Governu nia maneira atu redús taxa dezempregu liuhusi planu atu halo Peskiza Forsa Traballu ne’ebé sei hala’o iha tinan 2025, ne’ebé sei serbisu hamutuk nafatin ho Diresaun Nasionál Estatístika Timor-Leste atubele konfirma filafali dadus karik iha ona mudansa.
Mekanizmu di’ak hodi hamenus dezafiu kriasaun kampu traballu mak tenke kria polítika ne’ebé di’ak atubele responde ba juventude ne’ebé seidauk iha abilidade bele fó formasaun no fó kampu traballu liuhusi serbisu hamutuk ho CCI-TL atu iha vontade di’ak oinsá kria kampu traballu ba juventude sira ne’ebé formandu ona.
“Ita-nia knaar prinsipál mak oinsá forma ema atubele iha abilidade no kapasidade atubele responde ba demanda merkadu ne’ebé iha,” Diretór tenik.
Iha fatin hanesan, Prezidente Konfederasaun Sindikatu Timor-Leste (KSTL), Almério Vilanova, konsidera, atividade ohin ne’e importante tebes tanba liuhusi semináriu ne’e parte hotu bele fó hanoin ba malu hodi kontribui ba hametin no reforsa liutan papél no funsaun merkadu traballu.
“Ita iha númeru forsa laborál ne’ebé boot tebes, maioria joven ita haree ba merkadu traballu rai-laran ne’e kiik tanba dezafiu ne’ebé ita hasoru durante ne’e mak laiha investimentu boot husi empregadór estranjeiru sira-ne’ebé mai investe iha ita-nia rai hodi fó kampu traballu ba timoroan sira. Ida-ne’e mak kontribui ba númeru dezempregu ne’e aas,” nia dehan.
Almério Vilanova, nota katak Timor-Leste iha setór informál ne’ebé boot tebes, ne’ebé empregu informál ne’e 76%, ne’ebé bainhira polítika Governu nian di’ak bele kria kondisaun transforma setór informál, liu-liu agrikultura substénsia nomós sira ne’ebé serbisu informál ekonomia ne’e ba iha setór formál. Ida-ne’e nia impaktu pozitivu boot tebes ba kriasaun empregu produtivu iha Timor-Leste.
“Tuir ami-nia hanoin, Governu bele redús númeru dezempregu, tanba dala-barak ita foku liubá empregu estranjeiru, ita haruka ita-nia joven sira bá serbisu iha rai-li’ur ne’e di’ak maibé ita haree ba kurtu prazu, Governu mós tenke halo preparasaun kria programa no iha polítika ne’ebé di’ak hodi loke mós oportunidade empregu barak liután ba juventude sira iha rai-laran,” nia hato’o.
Almério Vilanova observa, bainhira haruka sai joven sira bá serbisu iha rai-li’ur ho tempu naruk bele fó impaktu boot ba rai-laran tanba lakon mão de obra ne’ebé kualifikadu, bainhira investidór boot ruma mai investe iha Timor-Leste sei presiza mão de obra kualifikadu.
“Ami nafatin fó hanoin ba Governu atu kria polítika ne’ebé efetivu liután, ne’ebé envolve liña ministeriál sira hotu, liu-liu ko’alia ho setór privadu sira, rona sira-nia hanoin no suporta sira hodi bele iha kapasidade absolve ita-nia problema empregu iha rai-laran,” Prezidente Konfederasaun katak.
Jornalista : Arminda Fonseca
Editora : Julia Chatarina
