DILI, 06 agostu 2024 (TATOLI)—Diresaun Nasionál Empregu Estranjeiru (DNEE) to’o agora rejista ona traballadór timoroan na’in-hitu prienxe ona kritériu hodi hola parte iha programa eskema Pacific Australian Labor Mobility (PALM) akompañamentu família.
Desde loke rejistrasaun hahú iha fevereiru 2024, iha traballadór na’in-27 maka aplika, ne’ebé ikus mai na’in-hitu maka prienxe ona kritériu, enkuantu na’in-20 seluk sei iha prosesu trata vistu no kumpre rekizitu sira seluk.
“Ita traballadór na’in-hitu maka hola parte iha programa akompañamentu família ne’ebé ba dala-uluk Governu Austrália fó oportunidade ida-ne’e ba traballadór timoroan ne’ebé sira-nia parseiru no oan sira bele akompaña sira bainhira serbisu iha Austrália,” Diretór Nasionál Empregu Estranjeiru, João Correia, informa ba Agência Tatoli iha ninia knaar fatin, Becora, tersa ne’e.
Notisia relevante : Programa pilotu akompañamentu família válidu de’it ba traballadór PALM
Programa akompañamentu família ne’e rasik aplika de’it ba traballadór ne’ebé hetan ona oportunidade bá serbisu iha Austrália ho longu prazu.
Nasaun sira ne’ebé sai benefisiáriu ba programa ne’e mak hanesan Quiribati, Fiji, Timor Leste, Tonga no Vanuatu.
Programa Pilotu ne’e ba faze dahuluk taka ona iha fulan-fevereiru liubá no daudaun ne’e faze daruak nian, ne’ebé loke ona rejistu to’o loron 09 agostu 2024.
Atu aplika ba akompañamentu família ne’e nia kritériu mak traballadór sira tenke ko’alia ho empregadór ne’ebé emprega traballadór sira hodi hatama aplikasaun, nune’e mós iha kritériu ne’ebé tenke prienxe husi na’in ba kompañia.
Karik empregadór aseita atu suporta traballador nia aplikasaun, maka traballadór tenke husu ba empregadór atu print formuláriu aplikasaun liuhusi pájina eskema PALM hodi fó ba traballadór hodi kompleta.
Traballadór sira tenke prenxe formuláriu kompletamente hodi asegura katak pergunta sira iha formuláriu hetan resposta kompletamente.
Ikus liu, aplikante sei fó formuláriu ne’e ba na’in ba kompañia ne’ebé fó serbisu ba sira. Empregadór sei reprezenta traballadór hodi aplika ba programa.
Jornalista : Arminda Fonseca
Editora : Julia Chatarina
