DILI, 07 agostu 2024 (TATOLI)–Sekretaria Estadu Formasaun Profisionál no Empregu (SEFOPE) seidauk bele implementa akordu mobilidade laborál ne’ebé antes ne’e asina ona ho Portugal.
Sekretáriu Estadu Formasaun Profisionál no Empregu, Rogério de Araújo Mendonça, no Ministra Solidariedade Sosiál no Inkluzaun, Verónica das Dores, asina akordu rua ho Ministra Traballu, Solidaridade no Seguransa Sosiál portugueza, Ana Mendes Godinho, iha loron 04 outubru 2023, iha Lisboa-Portugal.
Akordu rua ne’e mak hanesan administrativu ba aplikasaun konvensaun entre Timor-Leste no Portugal kona-ba seguransa sosiál no memorandu entendimentu kona-ba mobilidade traballadór timoroan.
“Mobilidade laborál ne’ebé antes ne’e asina ona, ita laiha prosesu kontinuasaun ida tanba ita seidauk prepara formadór sira hodi fó formasaun ba ita-nia joven sira molok bá serbisu iha Portugal. Akordu ba molidade laborál ne’e sei implementa maibé tenke halo mós preparasaun di’ak no iha Portugal mós iha Governasaun foun, entaun buat sira ne’e prosesu hotu. Ita hatene Portugal rasik mós susar hela bá serbisu buka fali iha nasaun seluk, agora Timor atu bá buka serbisu iha ne’ebá ida-ne’e prosesu hotu,” Sekretáriu Estadu Rogério de Araújo, informa ba Agência Tatoli, iha Palásiu Governu, kuarta ne’e.
Notísia relevante : SEFOPE no AHHA education selebra akordu apoia formasaun lian inglés ba timor-oan
Antes ne’e, Diretór Ezekutivu no Sekretáriu Estrategia Nasionál Empregu, Paulo Alves, hateten, akordu mobilidade traballadór ne’ebé Governu rua asina ona, antes ho intensaun fó protesaun ba joven timoroan sira ne’ebé hakarak bá serbisu iha Portugal, maibé iha rekezitu hanesan tenke hatene uluk lian portugés, tanba ne’e maka sei harii sentru formasaun ida atu hanorin lian portugés ba timoroan molok bá Portugal atu nune’e bainhira bá serbisu bele halo komunikasaun di’ak no fásil ho empregadór.
Formadór ne’ebé sei halo formasaun husi Portugal ho kooperasaun husi SEFOPE tanba programa ne’e responsabiliza hosi SEFOPE, hanesan instituisaun governamentál ne’ebé mak hamriik hodi mobiliza traballadór timoroan sira bá serbisu iha rai-li’ur.
Rekezitu bá serbisu iha Portugal maka tenke iha fíziku di’ak, labele komete krime, no hatene lian portugés.
Jornalista : Arminda Fonseca
Editora : Julia Chatarina
