DILI, 07 agostu 2024 (TATOLI)–Centro Nacional Chega, Institutu Públiku (CNC, I.P), kuarta ne’e, asina nota entendimentu ho Institutu São João de Brito (ISJB) Casait hodi hametin kooperasaun serbisu ne’ebé liga ba rekomendasaun sira husi relatóriu Comissão de Acolhimento, Verdade e Reconciliação (CAVR) Chega.
Akordu ne’e asina direitamente husi Diretór Ezekutivu CNC, I.P, Hugo Maria Fernandes no Reitór ISJB, Padre Isaías Abílio Caldas, ne’ebé serimónia asina realiza iha salaun ISJB, Casait, munisípiu Liquiçá.
“Objetivu husi nota entendimentu ne’e atu hametin kooperasaun serbisu entre CNC, I.P ho ISJB hodi implementa rekomendasaun sira husi relatóriu CAVR nomós Comissão Verdade e Amizade (CVA) Per Memoriam Ad Spem iha área edukasaun ba dame, istória, liu-liu ba integrasaun módulu Chega! iha kurríkulu no atividade ensinu aprendizajen nomós realizasaun workshop, konferénsia no palestra ne’ebé iha relasaun ho serbisu CNC, I.P nian,” Diretór Ezekutivu informa liuhusi nota ne’ebé Agência Tatoli asesu, kuarta ne’e.
Objetivu seluk husi nota entendimentu ne’e mak atu estabelese kolaborasaun hodi integra módulu Chega! iha kurríkulu edukasaun ba dame iha ISJB. Estabelese kolaborasaun hodi hadi’a kualidade edukasaun iha área edukasaun ba dame, liu-liu kolaborasaun iha área metodolojia hanorin.
Aleinde ne’e, atu estabelese kolaborasaun hodi envolve profesór ISJB iha formasaun ne’ebé fasilita husi CNC, I.P, estabelese koordenasaun regulár hodi realiza atividade estra-kurrikulár hanesan semináriu, palestra, konferénsia no vizita sítiu istóriku inklui partisipa atividade seluk sira ne’ebé parte rua dezenvolve.
Kooperasaun ne’e foku mos ba área sira mak hanesan kolabora hodi fahe ba malu koñesimentu no esperiénsia kona-ba metodolojia hanorin no kurríkulu kona-ba edukasaun ba istória no edukasaun ba dame nian.
Notísia relevante : Mandatu CNC Atu Promove no Disemina Rekomendasaun CAVR “Chega!”
Iha nota entendmentu ne’e, parte rua sei hamosu grupu tékniku hamutuk ba monitorizasaun no avalisaun, hafoin asina nota entendimentu ida-ne’e, ne’ebé grupu ne’e kompostu husi membru husi ema na’in haat rua husi CNC, I.P no ISJB hodi tau-matan ba implementasaun husi nota entendimentu, ho mós iha kbiit hala’o atividade monitorizasaun no avaliasaun ba nota entendimentu ida-ne’e, ne’ebé sei hala’o periódikamente dala-ida iha tinan-ida nia laran tuir ezijénsia ka nesesidade.
Nota ne’e hala’o bazeia ba misaun CNC, I.P nian ne’ebé promove implementasaun rekomendasaun sira husi relatóriu Chega! husi CAVR relativa ho institusionalizasaun memória no promosaun direitu umanu liuhusi edukasaun, formasaun no solidariedade ba sobrevivente ne’ebé vulnerável liuhusi violasaun direitu umanu, nune’e mos promove implementasaun rekomendasaun komun entre CAVR no CVA.
Kona-ba reparasaun, memorializasaun, estabelesimentu Sentru Nasionál Memória, Pesquiza no Aprendizajen tuir knaaar no mandatu ne’ebé hatuur ona iha dekretu-lei 48/2016, artigu 7 colaboração com outras entidades, temi iha númeru 3 no junta hamutuk ho artigu 6 competências, espesífika iha alínea b no j) husi lejislasaun ne’ebé aprova estatutu husi CNC, I.P.
Nune’e mos, bazeia ba despaisu ministeriál númeru 02/GM/MESCC/I/2022, Ministeriu Ensinu Superiór, Siénsia no Kultura fó lisensiamentu operasionál ba ISJB hanesan estabelesimentu ensinu superiór privadu ho tipu Institutu Universitáriu liuhusi despaisu ministeriál númeru.072/GM/MESCC/XII/20219. IJSB hanesan instituisaun líder ba formasaun profesór no sai hanesan sentru formasaun no edukasaun ba dame hodi guia feto no mane foin-sa’e sira atu forma rekursu umanu ne’ebé kualifikadu ho kualidade ne’ebé reflete iha lealdade, integridade, inklusiva, onestidade, responsabilidade no kortezia iha área ne’ebé sira estuda ba.
Ba ISJB edukasaun ba dame asume knaar krusiál iha promosaun ba dame ida-ne’ebé duradoura. Hadi’a edukasaun ba dame ne’e hanesan estratejia globál, rejionál, nasionál no lokál hodi hetan dame ida-ne’ebé metin ba tempu naruk.
Iha fatin hanesan, Reitór ISJB, Padre Isaías Abílio Caldas, hateten, sira-nia parte sente kontente tebes ho akordu ne’ebé ohin asina, nune’e ba oin sira-nia parte sei implmenta ho di’ak tuir akordu ne’ebé iha.
Jornalista : Arminda Fonseca
Editora : Julia Chatarina
