DILI, 07 agostu 2024 (TATOLI) – Governu liuhosi reuniaun Konsellu Ministru (KM) diskute no aprova projetu rezolusaun Governu, kona-ba konstituisaun no funsionamentu Komisaun Interministeriál ba Implementasaun no Monitorizasaun Planu Asaun Nasionál Kontra Violénsia Bazeia ba Jéneru (PAN-VBG) 2022-2032.
Rezolusaun Governu ne’e aprezenta hosi Ministru Prezidénsia Konsellu Ministru (MPKM), Agio Pereira no husi Sekretária Estadu Igualdade, (SEI) Elvina de Sousa Carvalho.
Hermenegildo Augusto Cabral Pereira. Imajen Tatoli/Francisco Sony
“Komisaun ne’e kompostu hosi reprezentante hosi Ministériu Edukasaun, Ministériu Administrasaun Estatál, Ministeriu Saúde, Ministériu Solidariedade Sosiál no Ministériu Justisa, nune’e mós Polísia Nasionál Timor-Leste no reprezentante tolu husi sosiedade sívil,” Ministru Agio ba jornalista sira, hafoin reuniaun KM, iha Palásiu Governu, kuarta ne’e.
Komisaun ne’e sei koordena hosi (MPKM). Komisaun ninia responsabilidade mak koordena atividade ne’ebé prevee iha PAN-VBG, apoia inisiativa avaliasaun, identifika progresu no dezafiu, elabora relatóriu atividade anuál sira no promove divulgasaun relatóriu hirak ne’e ba sosiedade sívil no ba públiku enjerál.
Kriasaun Komisaun ida-ne’e, ho hanoin atu hadi’a koordenasaun interministeriál no efikásia ba asaun prevensaun no kombate violénsia bazeia ba jéneru.
Medida ne’e mós ho objetivu atu hasa’e protesaun no apoiu ba vítima violénsia, promove igualdade jéneru no hametin mekanizmu legál no institusionál ne’ebé ho objetivu atu kombate diskriminasaun no violénsia.
Notísia relevante:SEI utiliza PAN-VBJ sai polítika nasionál kombate violénsia bazeia ba jéneru
Jornalista: Hortencio Sanchez
Editór : Rafael Ximenes de A. Belo
