DILI, 07 agostu 2024 (TATOLI)—Autoridade Aduaneira (AA)/Alfándega husu ba Governu atu aselera regulamentu ba báskula-ponte (jembatan timbang), ne’ebé lansa ona iha tinan kotuk hodi tetu karreta sira ne’ebé tula sasán tama husi Postu Integradu Batugadé, munisípiu Bobonaro.
Komisáriu interinu Alfándega, Armindo dos Santos, observa daudaun públiku kestiona kona-ba karreta sira ne’ebé tula sasán todan tama husi pontu entrada Batugadé dalaruma bele estraga estrada sira, tanba ne’e presiza rezolve.
“Maibé Alfándega seidauk bele utiliza báskula-ponte ba karreta sira tanba daudaun seidauk iha lei ruma ne’ebé bele regula, na’in ba lei ne’e mak Ministériu Transporte no Komunikasaun (MTK), nune’e husu atu aselera lalais lei tarifa hodi regula tanba tuir informasaun ne’ebé ami hetan katak lei ne’e ministériu lori ona ba Konsellu Ministru maibé to’o agora seidauk iha rezultadu,” Armindo dos Santos, hateten, iha Ministériu Finansa (MF), Aitarak-laran, kinta ne’e.
Nia dehan, Governu tenke foti lalais desizaun ba lei ne’ebé atu regula báskula-ponte, se lae karreta boot sira kontinua tula sasán tama mai livre no bele estraga mós estrada sira.
“Bainhira ita iha lei, maka ita bele regula karreta ida tula sasán nia todan hira no bele selu taxa. Ita-nia estrada sira mós la a’at arbiru, maibé agora ita labele halo buat ida tanba seidauk iha lei ne’ebé bele regula,” nia akresenta.
Antes ne’e, Governu liuhusi MF halo lansamentu báskula-ponte iha loron 17 fevereiru 2023, ne’ebé ninia funsaun mak tetu karreta sira ne’ebé tama bá territóriu Timor-Leste. Teste dahuluk ba ponte tetu ne’e hodi hatene karreta ne’ebé tula sasán importadu sira nia todan.
Notísia relevante : Governu lansa báskula-ponte ba karreta tula sasán iha fronteira Batugadé
Aleinde ne’e, liuhusi báskula-ponte ne’e bele hatene mós sasán nia todan iha karreta, nune’e karreta nia sasán nia todan labele afeta ba estrada dirasaun Batugadé-Dili.
Báskula-ponte ba tetu kamiaun sira ne’e sei estabelese mós iha Postu Integradu Salele (Covalima) no Sakato (Oé-cusse), ne’ebé ponte ne’e harii husi empreza Mota Loes ho kustu $139.000.
Jornalista : Arminda Fonseca
Editora : Julia Chatarina
