DILI, 07 Agostu 2024 (TATOLI) – Ministru Agrikultura, Pekuária, Peska no Floresta, Marcos da Cruz, husu ba populasaun sira iha Tutuala, munisípiu Lautém atu serbisu hamutuk ho Governu hodi proteje rekursu sira iha Parke nasionál Nino Konis Santana.
“Ha’u husu ba komunidade sira iha Tutuala atu kuidadu ita-nia área floresta sira iha Parke Nasionál Nino Konis Santana, tanba área ne’e agora hetan ona atensaun boot husi UNESCO atu hasa’e ninia nivel ba mundiál”, Marcos da Cruz dehan iha Praia dos Coqueiros, ohin.
Nia solisita ba populasaun sira atu labele tesi ai arbiru, kasa animál sira iha parke nasionál no iha área protejida sira seluk iha territóriu, nune’e bele proteje ambiente sira tanba liga ba ema nia moris.
Tuir governante, bainhira área protejida sira mak ai moris barak, fatin ne’e sei konserva bee hodi tulun agrikultór sira atu hasa’e produsaun iha rai-laran.
Tuir Dekretu-lei númeru 5/2011 kona-ba protesaun ambientál, Ministériu Agrikultura, Pekuária, Peska no Floresta (MAPPF) halo ona esforsu atu kontinua sensibiliza lei ba komunidade, tanba ne’e bandu ema labele estraga ambiente iha área protejidu sira, maski la kriminaliza ema ne’ebé kontra lei ne’e.
“Ita sei la kriminaliza maluk sira ne’ebé la kumpre lei atu lori bá tribunál, maibé ita sei hamutuk ho sira atu sosializa lei ne’e hodi konvense sira hodi bele hapara sira-nia atividade ilegál sira ne’e”, dehan.
Nia dehan bainhira komunidade iha ona koñesimentu bele hasa’e nivel Parke Nasionál Nino Koni Santana ba patrimóniu mundiál, tanba ne’e MAPPF sei serbisu hamutuk ho PAM Lautém no autoridade lokál sira atu kontrola komunidade.
Iha fatin hanesan, Prezidente Autoridade munisípiu Lautém, Mélio de Jesus, hateten atu prezerva no proteje Parke Nasional Nino Koni Santana tenke hapara sira-nia atividade ilegál sira hodi labele tesi ai no kasa animál sira arbiru.
“Ita fó ona autorizasaun ba PNTL no korpu guarda florestál iha Lautém atu kontrola komunidade ne’ebé kontinua tesi ai no kasa animál fuik sira’’, dehan.
Atu asegura área protejida ne’e maka Prezidente Autoridade Lautém husu ba Sekretáriu Estadu Floresta atu aumenta rekursu, nune’e sira bele halo kontrolu ida di’ak iha parke nasionál.
Guarda florestál iha Lautém hamutuk ema na’in-20, ne’ebé foin daudauk aumenta tan na’in-haat, maibé ida ne’e seidauk sufisiente.
Notísia relevante: Timor-Leste sei aprezenta Parke Nasionál Nino Konis Santana hanesan Patrimóniu Mundiál
Jornalista: Tomé Amado
Editora: Maria Auxiliadora
