DILI, 07 agostu 2024 (TATOLI)–Konsellu Nasionál Traballu (KNT) ne’ebé reprezenta husi Konfederasaun Sindikatu Timor-Leste (KSTL), Sekretaria Estadu Formasaun Profisionál no Empregu (SEFOPE) no Kámara Komérsiu Timor-Leste (CCI-TL, sigla portugés) kontinua luta hasa’e saláriu mínimu $115 iha Timor-Leste.
Prezidente KSTL, Almério Vilanova, haktuir, SEFOPE akompaña ho KSTL iha loron 09 abríl 2024, aprezenta proposta dekretu-lei saláriu mínimu ba $150 ba Konsellu Ministru. Iha ne’ebá Governu rejeita ho ida-ne’e, ekipa daudaun kontinua halo esforsu haree lakuna balun hadi’a hodi ba aprezenta filafali.
“Kestaun saláriu minímu daudaun iha prosesu nia laran. Konsellu Nasionál Traballu halibur informasaun no prepara dokumentu iha tempu badak sei aprezenta ba SEFOPE hodi lori filafali proposta dekretu-lei saláriu mínimu hodi ba aprezenta Konsellu Ministru,” Prezidente KSTL, Almério Vilanova, hateten, iha salaun Komisaun Nasionál Eleisaun (CNE, sigla portugés), kuarta ne’e.
Notisia relevante : KSTL triste Governu rejeita proposta lei ba saláriu mínimu
Ekipa kontinua halo konsultasaun ho ministériu relevante sira hanesan Estatístika, Makro Ekonomia iha Ministériu Komérsiu no Indústria (MKI), TradeInvest no ikus ho Ministériu Asuntu Kombatente no Libertasaun Nasionál (MAKLN) hodi ko’alia oituan kona-ba lei veteranu nian ne’ebé liga ba asuntu saláriu mínimu.
“Kona-ba saláriu sira mantein $150 maibé bainhira iha fali peskiza foun mak haree fali saláriu ne’ebé iha razoável duni ba situasaun nesesidade traballadór sira iha tempu agora ne’e ka lae,” nia akresenta.
Jornalista : Arminda Fonseca
Editora : Julia Chatarina
